Álim Beısembaev – álemdik deńgeıdegi fortepıanoshylar baıqaýynda jeńiske jetken tuńǵysh qazaqstandyq.
Ol — Qaraǵandy qalasynyń týmasy. Jýyrda Anglııanyń Lıds qalasynda ótken HH fortepıanoshylar baıqaýynda Álim «Ýoterman» altyn medali men 25 000 fýnt sterlıng syıaqyǵa ıe boldy.
QR Mádenıet jáne sport mınıstrliginiń baspasóz qyzmeti málimdegendeı, Álim "Warner Classics" kompanııasy uıymdastyrǵan daýys jazýǵa jáne "Steinway&Sons" tarapynan eýrotýr jasaýǵa múmkindik alǵan. Ol XX-XXI ǵasyrlardaǵy úzdik týyndylardy jaqsy oryndaǵany úshin beriletin Lıverpýldegi koroldik fılarmonııa qaýymdastyǵynyń jáne medici.tv nusqasy boıynsha kórermen kózaıymy syılyǵyna ıe bolǵan.
Baıqaý qorytyndysy boıynsha japonııalyq Kaıto Kobaıashı ekinshi oryn men kúmis medalǵa ıe bolsa, úzdik úshtikti ızraıldik Arıel Lanı túıindegen. Mýzykanttar Lıverpýldegi koroldik fılarmonııanyń dırıjeri Endrıý Maneniń súıemeldeýimen klassıkalyq týyndylardy oryndaǵan.
Álim – bul baıqaýda jeńiske jetken tuńǵysh qazaqstandyq ónerpaz. 23 jastaǵy mýzykant 2016 jyldyń qyrkúıeginen bastap Londondaǵy koroldik mýzyka kolledjiniń magıstratýrasynda oqıdy. Bul oqý ornynda ol tanymal professor – Vanessa Latarsh pen Dmıtrıı Alekseevten dáris alady.
5 jasynan bastap fortepıanoda oınaıtyn ol 2008 jyly «elkýnchık» atty televızııalyq baıqaýda jeńiske jetip, P.Chaıkovskıı atyndaǵy Máskeý memlekettik konservatorııasy janyndaǵy ortalyq mýzyka mektebine oqýǵa túsken. Araǵa 2 jyl salyp, Anglııadaǵy Persell mektebine aýysqan. Ol ataqty pedagog Tessa Nıkolsonnan tegin bilim alǵan.
Álim — Veımardaǵy Lıst atyndaǵy halyqaralyq jasóspirimder baıqaýynyń jáne Manchesterdegi halyqaralyq pıonıster baıqaýynyń jeńimpazy. Sondaı-aq Van Klıbern atyndaǵy jas pıonıster arasyndaǵy I halyqaralyq baıqaýda top jarǵan. Bul dodada Álim 20 jyldyq tarıhy bar baıqaýdyń negizin qalaýshy, álemge áıgili pıanıst Ýoterman atyndaǵy arnaıy syılyqty jeńip aldy.
– Bizge baıqaýǵa shamamen 300-350 mınýttyq repertýarmen qatysý kerek boldy. Oryndalatyn shyǵarmalardyń kólemi kóp bolǵandyqtan, óte qıyn baıqaýlardyń biri sanalady. Jeńisimnen keıin "Ýorner Klassıks" meniń jeke albomymdy basyp shyǵardy.
Jalpy ómirde ata-anamnyń ónerge qatysy joq. Men úıdegi jalǵyz mýzykantpyn. Ol kisilerdiń aıtýynsha, kishkentaı kezimde dúkenge barǵanymda, shaǵyn oıynshyq pıanıno tańdap alyppyn. Sodan beri fortepıano meniń ómirlik serigime aınaldy, — deıdi Álim Beısembaev.
Eýropada óz tyńdarmany bar jas ónerpaz osylaısha bul baıqaýda da kóptiń ystyq yqylasyna bólendi. Bolashaqta Álim týǵan jerinde de óner kórsetýdi armandaıdy.
"Adyrna" ulttyq portaly.
