تۇركىستان وبلىسى جەتىساي اۋدانىنىڭ تۇرعىنى مىڭجاسار شاڭقۇلوۆ ءوزىن مارقۇمدار قاتارىنا قوسىپ جىبەرگەن شىمكەنتتەگى №1 كلينيكالىق اۋرۋحانانىڭ ماماندارىنا نارازى. ازامات ءبىر جارىم جىلدان بەرى ءوزىنىڭ جەر باسىپ جۇرگەنىن دالەلدەي الماي كەلەدى، دەپ حابارلايدى "ادىرنا" ۇلتتىق پورتالى "31 ارناعا" سىلتەمە جاساپ.
قابىلداۋ بولىمىندەگى مەدبيكەلەر مەن ستاتيستتەردىڭ ورەسكەل قاتەلىگىنەن مىڭجاساردىڭ دەربەس دەرەكتەرى ويدا-جوقتا بۇعاتتالىپ قالىپتى. ەندى ول اۋرۋحانادان باستاپ، مينيسترلىككە قاراستى ەلەكتروندى دەنساۋلىق ساقتاۋ ورتالىعى ستاتۋسىمدى وزگەرتىپ، تىرىلەر قاتارىنا قايتا قوسۋعا اسىعار ەمەس دەپ اشىنادى.
بىلتىر ناۋرىزدا مىڭجاسار شاڭقۇلوۆتىڭ اكەسى شىمكەنتتەگى №1 كلينيكالىق اۋرۋحانادا كوز جۇمعان. مارقۇمنىڭ دەنەسىن اكەتۋگە بارعان ۇلى جاناشىرى رەتىندە جەكە كۋالىگىن تاپسىرعان. سول كەزدە قابىلداۋ بولىمىندەگى مەدبيكەلەر ونى دا قايتىس بولعاندار قاتارىنا قوسىپ جىبەرگەن.
“وسى تىركەۋگە تىركەگەن كەزدە مەنى دە ولىلەر قاتارىنا قوسىپ، تىركەپ جىبەرگەن. بىراق ەشقانداي سەبەپتەن-سەبەپسىز. تىركەۋ ءۇشىن قايتىس بولعانى تۋرالى انىقتاما بولۋ كەرەك. ونداي دەگەن جوق بۇلاردا. ولار دەرەۋ بازانى جاۋىپ تاستاي سالدى”، – دەيدى مىڭجاسار شاڭقۇلوۆ.
ءوزىن ولىلەر قاتارىنان كورىپ، جاعاسىن ۇستاعان مىڭجاسار شاڭقۇلوۆ ءتىرى ەكەنىن دالەلدەمەك بولىپ، ءبىراز مەكەمەنىڭ تابالدىرىعىن توزدىرادى. ءسويتىپ، تامىز ايىندا دەربەس دەرەكتەر بازاسىن قالپىنا كەلتىرگەن. الايدا بيىل ناۋرىزدا 15 جىل شەكارا كۇزەتكەن زەينەتكەردىڭ زەينەتاقىسى شوتىنا تۇسپەي قالىپتى. سويتسە، ولىلەر قاتارىنا قاتەلىكپەن تاعى ەكىنشى مارتە ەنىپ كەتىپتى. ونى حالىققا قىزمەت كورسەتۋ ورتالىعى دا دالەلدەپ بەرگەن.
زەينەتكەردىڭ سوزىنشە، اۋرۋحاناداعى قايتىس بولعاندار جۋرنالىنان ءوزىنىڭ اتى-ءجونىن الىپ تاستامايىنشا، دەرەكتەر بازاسىندا مۇنداي سوراقىلىق قايتالانا بەرمەك. ال اۋرۋحانا زاڭگەرى ەكىنشى مارتە ولىلەر قاتارىنا ەنىپ كەتۋىن رەسپۋبليكالىق بازاداعى قاتەلىك دەيدى.
“سول جەردە قايتىس بولدى دەپ، ەكىنشى مارتە تەحنيكالىق پورتالدا قايتادان ەنگىزىلىپ كەتتى”، – دەيدى زاڭگەر ابزال سەيىلحانوۆ.
اۋرۋحانا وكىلىنىڭ ايتۋىنشا، وزدەرى تاراپىنان مينيسترلىككە قاراستى ەلەكتروندى دەنساۋلىق ساقتاۋ ورتالىعىن سوتقا بەرىپ، ول ارىز قاناعاتتاندىرىلىپتى. ەندى دەربەس دەرەكتەر بازاسىن قالپىنا كەلتىرۋ ءۇشىن مينيسترلىككە حات جولداۋى ءتيىس. الايدا ول حاتتى اۋرۋحانا، ياعني دەنساۋلىق ساقتاۋ باسقارماسى سوزباققا سالىپ وتىر. ويتكەنى مينيسترلىكتىڭ وكىلى بازاعا وزگەرىس ەنگىزۋگە رەسمي حات ءالى جولدانبادى دەپ قىسقا قايىردى.
"ادىرنا" ۇلتتىق پورتالى.
