Jetisaılyq turǵyn óziniń tiri ekenin dáleldeı almaı júr

2981
Adyrna.kz Telegram

Túrkistan oblysy Jetisaı aýdanynyń turǵyny Myńjasar Shańqulov ózin marqumdar qataryna qosyp jibergen Shymkenttegi №1 klınıkalyq aýrýhananyń mamandaryna narazy. Azamat bir jarym jyldan beri óziniń jer basyp júrgenin dáleldeı almaı keledi, dep habarlaıdy "Adyrna" ulttyq portaly "31 arnaǵa" silteme jasap.

Qabyldaý bólimindegi medbıkeler men statıstterdiń óreskel qateliginen Myńjasardyń derbes derekteri oıda-joqta buǵattalyp qalypty. Endi ol aýrýhanadan bastap, mınıstrlikke qarasty elektrondy densaýlyq saqtaý ortalyǵy statýsymdy ózgertip, tiriler qataryna qaıta qosýǵa asyǵar emes dep ashynady.

Byltyr naýryzda Myńjasar Shańqulovtyń ákesi Shymkenttegi №1 klınıkalyq aýrýhanada kóz jumǵan. Marqumnyń denesin áketýge barǵan uly janashyry retinde jeke kýáligin tapsyrǵan. Sol kezde qabyldaý bólimindegi medbıkeler ony da  qaıtys bolǵandar qataryna qosyp jibergen.

“Osy tirkeýge tirkegen kezde meni de óliler qataryna qosyp, tirkep jibergen. Biraq eshqandaı sebepten-sebepsiz. Tirkeý úshin qaıtys bolǵany týraly anyqtama bolý kerek. Ondaı degen joq bularda. Olar dereý bazany jaýyp tastaı saldy”, – deıdi Myńjasar Shańqulov.

Ózin óliler qatarynan kórip, jaǵasyn ustaǵan Myńjasar Shańqulov tiri ekenin dáleldemek bolyp, biraz mekemeniń tabaldyryǵyn tozdyrady. Sóıtip, tamyz aıynda derbes derekter bazasyn qalpyna keltirgen. Alaıda bıyl naýryzda 15 jyl shekara kúzetken zeınetkerdiń zeınetaqysy shotyna túspeı qalypty. Sóıtse, óliler qataryna qatelikpen taǵy ekinshi márte enip ketipti. Ony halyqqa qyzmet kórsetý ortalyǵy da dáleldep bergen.

Zeınetkerdiń sózinshe, aýrýhanadaǵy qaıtys bolǵandar jýrnalynan óziniń aty-jónin alyp tastamaıynsha, derekter bazasynda mundaı soraqylyq qaıtalana bermek. Al aýrýhana zańgeri ekinshi márte óliler qataryna enip ketýin respýblıkalyq bazadaǵy qatelik deıdi.

“Sol jerde qaıtys boldy dep, ekinshi márte tehnıkalyq portalda qaıtadan engizilip ketti”, – deıdi zańger Abzal Seıilhanov.

Aýrýhana ókiliniń aıtýynsha, ózderi tarapynan mınıstrlikke qarasty elektrondy densaýlyq saqtaý ortalyǵyn sotqa berip, ol aryz qanaǵattandyrylypty. Endi derbes derekter bazasyn qalpyna keltirý úshin mınıstrlikke hat joldaýy tıis. Alaıda ol hatty aýrýhana, ıaǵnı densaýlyq saqtaý basqarmasy sozbaqqa salyp otyr. Óıtkeni mınıstrliktiń ókili bazaǵa ózgeris engizýge resmı hat áli joldanbady dep qysqa qaıyrdy.

 

"Adyrna" ulttyq portaly.

Pikirler