بۇگىندە قۇرىلىس جۇمىستارى ءجۇرىپ جاتىر.
بۇل قۇرىلىس 2023 جىلدىڭ ءتورتىنشى توقسانىندا اياقتالىپ، ەل يگىلىگىنە بەرىلمەك. ءىرى جوبانى وسى ءوڭىردىڭ تۋماسى ءوز قارجىسىنا سالىپ جاتىر.
امانگەلدى اۋىلىنداعى تۋريستىك ورتالىق جۇرتتى نەسىمەن قىزىقتىرادى؟
تالعاتبەك ابدىقوجا، ءتىلشى:
- تۋريستىك كەشەن امانگەلدى اۋىلىنىڭ ىرگەسىندە، ەلدىڭ ورتالىعى مەن باتىسىن جالعايتان تاس جولدىڭ بويىندا سالىنىپ جاتىر. اۋماعى – جەتى گەكتار. كەشەن ىشىندە جالپى سانى 12 نىسان بوي كوتەرەدى. ارقايسىنىڭ وزىندىك ەرەكشەلىگى بار. ولار الەمنىڭ جەتى كەرەمەتىنە كىرەتىن ءارى تاريحي ماڭىزى زور نىسانداردىڭ كوشىرمە ۇلگىسى رەتىندە سالىنادى.
ساپار ىسقاقوۆ، «بابالار ىزىمەن» عىلىمي ەكسپەديتسياسىنىڭ جەتەكشىسى:
- ەڭ تورىندە تۇرعان – ءتاجماحال. بۇل ءۇندىستاندا بار. ءبىز ونى ءۇش ەسە ازايتىپ الدىق. ءۇندىستاندا ونىڭ بيىكتىگى 75 مەتر بولاتىن بولسا، مۇندا 25 مەتر. ودان باسقا، يسپانيادا، برازيليادا، ەۋروپا، ازيا ەلدەرىندە كەزدەسەتىن ۇلكەن عيماراتتاردىڭ كوشىرمەلەرى. ساقتاردىڭ ساۋناسى بار. وندا ءبىز شەت ەلدەن كەلەتىن تۋريستەردى تارتۋ ءۇشىن ىستەپ وتىرمىز. ويتكەنى ساقتاردىڭ ساۋناسى دۇنيەجۇزىندەگى ەلدەردە كەزدەسە بەرمەيدى. ونىڭ جانىنا ءبىز كيىز ءۇي تىگىپ وتىرمىز.
كەشەن اۋماعىندا قىزعالداق ۇلگىسىندەگى مۇراجاي، ەگيپەتتەگى پيراميدا، مايا تايپالارىنان قالعان چيچەن-يتسا ۇلگىسىندە مەموريال، سۋ بۇرقاقتار مەن باسسەيندەر سالىنادى. سونداي-اق جاپون، اعىلشىن جانە قازاق باعىن ءوسىرۋ جوسپارلانعان.
تالعاتبەك ابدىقوجا، ءتىلشى:
- تۋريستىك كەشەندە بوي كوتەرگەن نىسانداردىڭ ءبىرى – مىنا ەستەلىك قابىرعا. ۇزىندىعى 35, بيىكتىگى 3 م 80 سم. جوبا بويىنشا مۇندا ەل ءۇشىن ەڭبەك ەتكەن تاريحي تانىمال تۇلعالارىمىز بەن وزگە ەلدەردە بيلىك قۇرىپ سول جەردە جەرلەنگەن بابالارىمىزدىڭ قابىر باسىنان ءبىر ۋىس توپىراق الىپ كەلىپ، ارنايى ساقتالادى. ولار تۋرالى اقپاراتتار جازىلادى. بۇل كوپشىلىك ءتاۋ ەتۋگە كەلىپ، قۇران باعىشتايتىن ورىنعا اينالادى.
كارانتينگە بايلانىستى كەشەندى سالىپ جاتقان قۇرىلىسشىلار سانى كوپ ەمەس. 20-30 ادام عانا جۇمىس ىستەپ ءجۇر. بارلىعى وسى اۋىلدىڭ تۇرعىنى. قۇرىلىسشىلار كۇنى قارساڭىندا اۋدان اكىمدىگىنىڭ وكىلدەرى مەن وزگە وڭىرلەردەن كەلگەن كاسىپكەرلەر قۇرىلىس اۋماعىنا ارنايى بارىپ، جۇمىس بارىسىمەن تانىستى.
تالعات قاربوزوۆ، امانگەلدى اۋدانىنىڭ اكىمى:
- بۇل جالعىز اۋداننىڭ عانا ەمەس، وبلىستىڭ، جالپى قازاقستاننىڭ تۋريزم سالاسىن دامىتۋعا بىردەن-ءبىر سەپتىگىن تيگىزەتىن جوبا. بيىلعى جىلى ەكى-ءۇش نىسان اياقتالۋعا جاقىن. بۇل ارينە، اۋدانىمىزدىڭ تۋريزم سالاسىن دامىتۋعا، جاڭا جۇمىس ورىندارىن اشۋعا، جەرگىلىكتى بيۋدجەتكە سالىق تۇسىمدەرىنىڭ كوبەيۋىنە بىردەن-ءبىر سەپتىگىن تيگىزەدى. حالىق وسى جوبانى قازىر كۇتۋدە. جەرگىلىكتى اتقارۋشى ورگان تاراپىن قاجەتتى جۇمىستاردى بىرلەسىپ جاساپ جاتىرمىز. جوبا ىسكە اسقان جاعدايدا ودان دا كوپ جۇمىس ورىندارى اشىلادى. ويتكەنى ءار ساۋدا نۇكتەلەرىنە، ءار ويىن الاڭدارىنا قاجەتتى جۇمىسكەرلەردىڭ ءبارى وسى جەرگىلىكتى ادامدارمەن قامتىلادى دەپ كۇتىلۋدە.
كەشەن ءوڭىردىڭ تۋريزم سالاسىن دامىتىپ، اۋداننىڭ الەۋمەتتىك-ەكونوميكالىق جاعدايىن جاقسارتاتىنى بەلگىلى. سونىمەن قاتار بۇل جەر جاستاردىڭ تاريحقا دەگەن قىزىعۋشىلىعىن وياتىپ، پاتريوتتىق تاربيە بەرەتىن ورىنعا اينالۋى مۇمكىن.
سۇلتانبەك تاشكەنباي، كاسىپكەر:
- وسكەلەڭ ۇرپاق ءۇشىن پاتريوتتىق سەزىم تۋدىراتىن نىسان دەپ ويلايمىن. سەبەبى دۇنيەجۇزىندە جاتقان 200 ادامنىڭ توپىراعىن وسى جەرگە اكەلىپ وسى جەردە جاساپ، سونىڭ ءومىربايانىن جازىپ قويۋ دەگەن ول ءبىزدىڭ مەكتەپتەگى تاريحىمىزدا، باسقالارىندا ءدال ولاي ايتىلماعان. جاستار ونى وقىعاننان كەيىن ءبىزدىڭ بابالارىمىز بولعان ەكەن وسىنداي دەپ سولاردى بىلسە، ءبىزدىڭ جاستارىمىزعا ۇلكەن تاربيەلىك ءمانى بار.
كەشەندە تۋريستەردىڭ تىنىعۋىنا ارنالعان قوناق ءۇي، تاماقتانۋ ورىندارى دا سالىنادى. قۇرىلىس ءساتتى اياقتالسا، بۇل ءار تاسى تاريحقا تولى تورعاي وڭىرىنە تۋريستەردى كوپتەپ تارتۋعا جانە كونە وركەنيەتتىڭ ءىزى سانالاتىن گەوگليفتەردىڭ قۇپياسىن اشىپ، ناسيحاتتاۋعا سەپتىگىن تيگىزبەك.
اۆتورلارى: تالعاتبەك ابدىقوجا، قۋانىش قوجابەكوۆ
