كەيىنگى 3 جىلدا قوستاناي وبلىسىندا سپورت كەشەندەرىنىڭ سانى 3 مىڭعا جۋىقتادى. ناتيجەسىندە ءوڭىر تۇرعىندارىنىڭ 34 پروتسەنتكە جۋىعى بۇقارالىق سپورتپەن قامتىلدى.
وبلىس اكىمى ارحيمەد مۇحامبەتوۆ سپورت ارداگەرلەرىمەن بىرگە جاڭادان سالىنعان نىسانداردى ارالادى.
وڭىردەگى سپورت ارداگەرلەرى مەن قوعام بەلسەندىلەرى اۋەلى بولاشاق بىلعارى قولعاپ شەبەرلەرىن شىنىقتىرۋ مەكتەبىنە باردى. جاڭا نىسان بارلىق تالاپتارعا ساي جاساقتالعان. ال 2500 كورەرمەنگە ارنالعان مۇز سارايىنىڭ قۇرىلىسى بيىل اياقتالماق. سونداي-اق قوستاناي قالاسىندا جاڭادان بوي كوتەرگەن شاعىن اۋدانداردىڭ ماڭىنان بىرنەشە سپورت نىساندارى سالىنعان. سولتۇستىك-باتىس ىقشام اۋدانىنداعى 50 مەترلىك باسسەيننىڭ دە قۇرىلىسى بيىل ءبىتىپ، تۇرعىندار يگىلىگىنە بەرىلمەك.
نۇرجان ەرماعامبەتوۆ، «ق.وسپانوۆ اتىنداعى №1 بالالار-جاسوسپىرىمدەر سپورت مەكتەبى» كمم باسشىسى:
– 50 مەترلىك باسسەين 10 جولاقتان تۇرادى. سونداي-اق كورەرمەندەر ءۇشىن 300 ورىندىق جاساقتالعان. قۇرىلىس الاڭى 3700 شارشى مەتردەن اسادى. بۇل وليمپيادالىق ستاندارتتارعا سايكەس كەلەدى. ىسكە قوسىلعاننان كەيىن باسسەين ساعاتىنا 100 ادامدى قابىلداي الادى. ودان بولەك مۇندا جاتتىعۋ زالى دا جۇمىس ىستەمەك. وڭىردە 32 بالالار مەن جاسوسپىرىمدەر سپورت مەكتەبى جانە 29 اۋلا كلۋبى جۇمىس ىستەيدى. جالپى، سپورت سەكتسيالارىندا 70 مىڭنان استام وقۋشى جاتتىعادى، ونىڭ 64 پروتسەنتى تەگىن شۇعىلدانا الادى. سونىمەن قاتار قالانىڭ جاڭا شاعىن اۋداندارى جاتتىعۋ الاڭدارىمەن قامتاماسىز ەتىلگەن. قازىر وڭىردەگى جاساندى جابىندىسى بار 85 سپورت الاڭىنىڭ بار بولسا، ونىڭ تەڭ جارتىسى اۋىلدى جەرلەردە ورنالاسقان.
ارحيمەد مۇحامبەتوۆ، وبلىس اكىمى:
– ءبىزدىڭ نەگىزگى ماقساتىمىز – جىل سايىن بۇقارالىق سپورتتى دامىتىپ، تۇرعىنداردىڭ سالاۋاتتى ءومىر سالتىن ۇستانۋىنا جاعداي جاساۋ. بۇگىندە 9 مىڭعا جۋىق سپورت سەكتسياسىنىڭ جۇمىسى ۇيىمداستىرىلدى. وبلىستىڭ 150 مىڭنان استام تۇرعىنى شۇعىلدانادى. ونىڭ ىشىندە اۋىلدىق جەرلەردە 80 مىڭداي ادامدى قامتي وتىرىپ 5 مىڭ سپورت سەكتسياسى قۇرىلدى.
مەملەكەت باسشىسىنىڭ تاپسىرماسى بويىنشا، بيىل وبلىستا مەملەكەتتىك سپورتتىق تاپسىرىس جۇزەگە اسىپ جاتىر. وسىنىڭ ارقاسىندا 2 مىڭنان استام بالا تەگىن سپورتتىق ساباقتارمەن قامتاماسىز ەتىلەدى. 2025 جىلعا قاراي وبلىس تۇرعىندارىنىڭ كەمىندە 45%-ءىن سپورتپەن قامتۋ جوسپارلانىپ وتىر.
اۆتورلارى: اسلانبەك شىعىر، جاندوس راحمەتۋللين
