اۋعانستاندى تۇتاس جاۋلاپ العان "تاليبان" قوزعالىسىنىڭ اراسىندا ءوزارا قىرقىس باستالدى. بىرنەشە لاڭكەستىك توپتىڭ باسىن قۇراعان كواليتسيا كۇشتەرى بيلىككە تالاسىپ جاتىر. ولار كابۋل، قانداعار جانە مازاري-ءشاريفتى باقىلاۋ جانە سالىق پەن كەدەننەن تۇسەتىن پايدانى يەمدەنۋ ءۇشىن كۇرەسۋدە. ءتىپتى تاليباننىڭ بەلدى مۇشەسى بارادار ءوزارا قىرقىستا قازا تاپتى دەگەن دە اقپاراتتار بار.
بۇل اقپارات الەۋمەتتىك جەلىلەردە بارادار كاتار سىرتقى ىستەر مينيسترىمەن كەزدەسۋگە كەلمەگەن سوڭ پايدا بولعان. مولدا ءوزىنىڭ جاقتاستارى مەن ەكسترەميستىك "حاككاني جەلىسىنىڭ" اراسىنداعى قاقتىعىستا ولتىرىلگەنى حابارلاندى. توپتىڭ ساياسي بيۋروسىنىڭ وكىلى موحامماد نايم بۇل قاۋەسەتتىڭ شىندىققا جاناسپايتىنىن جانە باراداردىڭ ءتىرى ەكەنىن ايتتى. "تاليبان" مولدا ءوزىنىڭ ءولىمى تۋرالى حاباردى جوققا شىعاراتىن اۋديوجازبانى جاريالادى. الايدا اۋعاندىقتار ۇكىمەتكە سەنبەيدى جانە دالەل رەتىندە ۆيدەونى تالاپ ەتۋدە.
سونداي-اق سودىرلاردىڭ وكىلى ەنامۋللا سامانگاني راديكالدى قوزعالىستىڭ ءبولىنۋى تۋرالى قاۋەسەتتى جوققا شىعاردى. "تاليباندار ءبىرتۇتاس، ال باسشىلىق ءدىن مەن ەلگە قىزمەت ەتۋ ءۇشىن كۇرەسۋدە، بىزدە قارجى مەن بايلىققا اشكوزدىك جوق", - دەپ قورىتىندىلادى ول.
7 قىركۇيەكتە "تاليبان" اۋعانستاننىڭ جاڭا ۇكىمەتىنىڭ قۇرامىن جاريالادى. مۇحاممەد حاسان احۋند پرەمەر -ءمينيستردىڭ مىندەتىن اتقارۋشى بولدى. "تاليبان" ساياسي كەڭسەسىنىڭ باسشىسى ابدۋل-عاني بارادار ونىڭ ءبىرىنشى ورىنباسارى، ابدۋل-سالام حانافي ەكىنشى ورىنباسارى بولىپ تاعايىندالدى.
"تاليبان" باسشىلىعىنىڭ وكىلى امير حان موتتاكي اۋعانستان سىرتقى ىستەر مينيسترلىگىنىڭ باسشىسى بولدى. "تاليبان" باسشىسىنىڭ ورىنباسارى مۇحاممەد ياكۋب قورعانىس ءمينيسترى بولدى. ىشكى ىستەر ءمينيسترى بولىپ ەكسترەميستىك "حاككاني جەلىسىنىڭ" جەتەكشىسى ساراجۋددين حاككاني تاعايىندالدى.
"ادىرنا" ۇلتتىق پورتالى
