الماتى وبلىسىنىڭ اۆات اۋىلىندا 46 جاستاعى مەكتەپ ديرەكتورىنىڭ اسىلىپ تۇرعان دەنەسى ءوز ءۇيىنىڭ قوراسىنان تابىلدى، دەپ حابارلايدى "ادىرنا" ۇلتتىق پورتالى.
قايعىلى وقيعاعا قاتىستى سوتقا دەيىنگى تەرگەۋ جۇمىستارى باستالدى. ءبىلىم ورداسىنداعى كيكىلجىڭدەر ادام ولىمىنە اكەلۋى مۇمكىن دەگەن بولجامدار ايتىلدى.
مارقۇم ازيزجان داراەۆ 2011 جىلدان بەرى گ. سادۆاكاسوۆ اتىنداعى مەكتەپتە جۇمىس ىستەگەن. ءۇش بالاسى بار. “ەكپرەسس ك” باسىلىمى اۋىل تۇرعىندارى مەكتەپ ديرەكتورىنىڭ پاراساتتى ادام بولعانىن ايتىپ ءولىم سەبەپتەرىن ءجىتى تەكسەرۋدى تالاپ ەتەتىندەرىن مالىمدەدى.
“قول استىنداعى قىزمەتكەرى مەن مەكتەپ ديرەكتورىنىڭ اراسىندا جانجال بولعان. مەكتەپتە قۇيتىرقى ارەكەتتەرگە بارعان ءۇشىن پەداگوگ جۇمىستان شىعارىلعان. دەسە دە، الگى قىزمەتكەر سوت ارقىلى قايتا ورالىپ، ديرەكتورعا قوقان-لوققى كورسەتكەن. سوتتىڭ بارلىق ينستانتسيالارى ارقىلى شاعىم تۇسىرگەن”، – دەلىنگەن جازبادا.
ايتا كەتەيىك، قازىرگى تاڭدا مەكتەپ ديرەكتورىنىڭ ولىمىنە قاتىستى قىلمىستىق ءىس قوزعالىپ تەرگەۋ امالدارى جۇرگىزىلۋدە. مارقۇمنىڭ مۇنداي ارەكەتكە نە سەبەپتى بارعانى انىقتالۋدا.
"ادىرنا" ۇلتتىق پورتالى
