التىن ادام تابىلعان ەسىك قالاسىنىڭ ماڭايىندا ارحەولوگتار ءالى دە زەرتتەۋ جۇرگىزۋدە. ەسىك مەملەكەتتىك تاريحي-مادەني قورىق مۋزەيىنىڭ عىلىمي قىزمەتكەرلەرى قازبا جۇمىستارى بارىسىندا قولا ءداۋىرىنىڭ ەكى قاباتتى وباسىن تاپتى، دەپ حابارلايدى «ادىرنا» ءتىلشىسى «Qazaqstan» ۇلتتىق ارناسىنا سىلتەمە جاساپ.
اعا عىلىمي قىزمەتكەر حاميت امانتايۇلى ەكى قاباتتى مولانى ورىكتى اۋىلىنىڭ ماڭىنداعى ۇلكەن قورىمنان تاۋپتى. شامامەن قولا داۋىرىنە جاتقىزىپ وتىر. ەكى اياعىن بۇگىپ جاتقان ءبىر ادامنىڭ قاڭقاسىنىڭ اياعىنىڭ تومەنگى جاعىنان تاستان قالانعان شەڭبەرگە كەزىككەن. ونى قازعاندا ىشىندە جاتقان تاعى ءبىر ادام سۇيەگىنە تاپ بولعان. جەرلەۋ ءراسىمىن قولا ءداۋىرىنىڭ مادەنيەتىنە جاتقىزىپ وتىر.
حاميت امانتايۇلى، ەسىك مەملەكەتتىك تاريحي-مادەني قورىق مۋزەيىنىڭ اعا عىلىمي قىزمەتكەرى:
قولا داۋىرىنە دە وزىنە ءتان قىش ىدىستارىنىڭ فراگمەنتتەرى، سونداي-اق تاستان جاسالعان پىشاق بار. ونىڭ ءبىر شەتى سىنعان. ول كەزدەگى نانىم-سەنىم بويىنشا جالپى سىنعان ءنارسى، سىندى دەگەن نارسە ءولدى دەگەنمەن بىردەي بولىپ، ولگەن اداممەن بىرگە قويىلاتىن اتريبۋت ەسەبىندە پايدالانعان.
مۋزەي زەرتتەۋشىلەرى وسى ماڭايدا نەوليت، تەمىر داۋىرلەرىندە دە ادامدار ءومىر سۇرگەن دەيدى. تابىلعان ارتەفاكتىلەر زەرتحانادا دالەلدەنسە 40-45 مىڭ جىلدىق قونىستاردىڭ كۋاسى بولاتىنىن ايتادى. ال قورىق-مۋزەيدىڭ وزىندە دە جاڭالىق جوق ەمەس. جىلقىنىڭ قازاق دالاسىندا قولعا ۇيرەتىلگەنىن العا تارتىپ، ەڭبەكشىقازاق اۋدانى ماڭىنان جىلقى مالىنا قاتىسى بار دۇنيەلەردى جۇرت نازارىنا ۇسىنىپ وتىر.
دوسىم زىكىريا، ەسىك مەملەكەتتىك تاريحي-مادەني قورىق مۋزەيى ديرەكتورىنىڭ ورىنباسارى:
ولار بۇيىمداردىڭ كوبى ەرتە تەمىر داۋىرىنەن ورتا عاسىرعا دەيىن كەلەدى. مىسالى كەلۋشىلەرگە ەرتە تەمىر داۋىرىندەگى اۋىزدىقتاردىڭ قانداي بولعانىن، شىڭعالارىمىزدىڭ، ۇزەڭگىلەردىڭ قانداي بولعانىن وسى كورمە ارقىلى تاماشاي الادى.
قازىر مۇنداعى عالىمدار مادەنيەت جانە سپورت مينيسترلىگىنىڭ «عىلىمي قولدانبالى زەرتتەۋ» بيۋدجەتتىك باعدارلاماسىنىڭ ەكى جوباسىن قولعا العان. ورىكتى شاتقالىندا زەرتتەۋ جۇمىستارى ءالى دە جالعاسۋدا.
«ادىرنا» ۇلتتىق پورتالى
