بيلىككە شاۆكات ميرزياەۆ كەلگەلى بەرى بولىپ جاتقان وزگەرىستەر ارقاسىندا وزبەكستاننىڭ ەكونوميكاسى ەرەكشە قارقىنمەن دامىپ بارادى، سونىڭ ارقاسىندا ول ون جىلدا ورتالىق ازياداعى كوشباسشى – قازاقستاندى باسىپ وزىپ، ايماقتاعى ەڭ قۋاتتى ەلگە اينالۋى ىقتيمال. بريتاندىق Financial Times باسىلىمى وسىنداي بولجام جاسايدى دەپ حابارلايدى "ادىرنا" ۇلتتىق پورتالى "azattyq.org"-كە سىلتەمە جاساپ.
گازەتتىڭ جازۋىنشا، بەس جىل بۇرىن عانا وزبەكستان ينۆەستيتسيا قابىلداۋعا دارمەنسىز ەدى. قازىر ول "ەكونوميكالىق وسىمىمەن كۇللى الەم ينۆەستورلارىن وزىنە قاراتىپ وتىر". اۆتوردىڭ جازۋىنشا، "ەلدىڭ قارجىسىن قۇپيا ۇستاعان" اۆتوريتار پرەزيدەنت يسلام كاريموۆ 2016 جىلى كوز جۇمعان سوڭ بيلىككە كەلگەن ميرزياەۆ ۆاليۋتانى ليبەرالداندىرىپ، "جاڭا رەفورماعا جول اشقان".
وزبەكستان دۇنيەجۇزىلىك بانكتىڭ بيزنەس جۇرگىزۋ جەڭىلدىگى رەيتينگىندە 2015 جىلى 141-ورىندا بولسا، بىلتىر 69-ورىنعا كوتەرىلگەن. وسى ارالىقتا مەملەكەت سالىقتى ازايتىپ، بيۋدجەت مالىمەتتەرىن جاريالاۋعا كوشتى، كورشىلەرمەن ساۋدانى جانداندىردى، يپوتەكا نەسيەسىن بەرە باستادى.
ەۋروپا قايتا قۇرۋ جانە دامۋ بانكى بۇل ەلگە جالپى 2,6 ملرد ەۋرو ينۆەستيتسيا قۇيعان، سونىڭ جارتىسىنان استامى – قازىر ءجۇرىپ جاتقان جوبالار.
2015 جىلدان بەرى تىكەلەي ينۆەستيتسيا كولەمى ءۇش ەسە ۇلعايىپ، 1,7 ملرد دوللارعا جەتكەن، ونىڭ كوبى جاسىل ەكونوميكاعا سالىنىپ جاتىر. ەل استاناسى – تاشكەنتتە ەليتالىق ءۇي-جاي، قىمبات كولىك كوبەيگەن، اراسىندا ەلەكتر كولىكتەرى دە بار. دەگەنمەن شەشىلمەگەن ماسەلە دە كوپ دەيدى اۆتور. سونىڭ ءبىرى – حالىقتىڭ كەدەيلىگى. ەلدەگى ورتاشا ايلىق جالاقى – 160 دوللار.
"كەيبىر حالىقارالىق بولجامدارعا قاراعاندا، حالىق سانىنىڭ ءوسۋى مەن ەكونوميكانى ءارتاراپتاندىرۋ ارقاسىندا وزبەكستان قازاقستاندى باسىپ وزىپ، ون جىل ىشىندە ورتالىق ازياداعى ەڭ ءىرى ەكونوميكاعا اينالۋى مۇمكىن. وزبەكستان پوستسوۆەتتىك ەلدەردىڭ كوبىن بىرىكتىرەتىن تاۋەلسىز مەملەكەتتەر دوستاستىعىندا رەسەيدەن كەيىنگى ەكىنشى ورىندى الۋعا ۇمتىلادى" — دەپ جازادى Financial Times.
"ادىرنا" ۇلتتىق پورتالى.
