Bılikke Shavkat Mırzııaev kelgeli beri bolyp jatqan ózgerister arqasynda Ózbekstannyń ekonomıkasy erekshe qarqynmen damyp barady, sonyń arqasynda ol on jylda Ortalyq Azııadaǵy kóshbasshy – Qazaqstandy basyp ozyp, aımaqtaǵy eń qýatty elge aınalýy yqtımal. Brıtandyq Financial Times basylymy osyndaı boljam jasaıdy dep habarlaıdy "Adyrna" ulttyq portaly "azattyq.org"-ke silteme jasap.
Gazettiń jazýynsha, bes jyl buryn ǵana Ózbekstan ınvestıııa qabyldaýǵa dármensiz edi. Qazir ol "ekonomıkalyq ósimimen kúlli álem ınvestorlaryn ózine qaratyp otyr". Avtordyń jazýynsha, "eldiń qarjysyn qupııa ustaǵan" avtorıtar prezıdent Islam Karımov 2016 jyly kóz jumǵan soń bılikke kelgen Mırzııaev valıýtany lıberaldandyryp, "jańa reformaǵa jol ashqan".
Ózbekstan Dúnıejúzilik banktiń bıznes júrgizý jeńildigi reıtınginde 2015 jyly 141-orynda bolsa, byltyr 69-orynǵa kóterilgen. Osy aralyqta memleket salyqty azaıtyp, bıýdjet málimetterin jarııalaýǵa kóshti, kórshilermen saýdany jandandyrdy, ıpoteka nesıesin bere bastady.
Eýropa qaıta qurý jáne damý banki bul elge jalpy 2,6 mlrd eýro ınvestıııa quıǵan, sonyń jartysynan astamy – qazir júrip jatqan jobalar.
2015 jyldan beri tikeleı ınvestıııa kólemi úsh ese ulǵaıyp, 1,7 mlrd dollarǵa jetken, onyń kóbi jasyl ekonomıkaǵa salynyp jatyr. El astanasy – Tashkentte elıtalyq úı-jaı, qymbat kólik kóbeıgen, arasynda elektr kólikteri de bar. Degenmen sheshilmegen másele de kóp deıdi avtor. Sonyń biri – halyqtyń kedeıligi. Eldegi ortasha aılyq jalaqy – 160 dollar.
"Keıbir halyqaralyq boljamdarǵa qaraǵanda, halyq sanynyń ósýi men ekonomıkany ártaraptandyrý arqasynda Ózbekstan Qazaqstandy basyp ozyp, on jyl ishinde Ortalyq Azııadaǵy eń iri ekonomıkaǵa aınalýy múmkin. Ózbekstan postsovettik elderdiń kóbin biriktiretin Táýelsiz memleketter dostastyǵynda Reseıden keıingi ekinshi oryndy alýǵa umtylady" — dep jazady Financial Times.
"Adyrna" ulttyq portaly.
