“پاتەر الىپ بەرەمىن”: تۇركىستاندىقتار 15 ملن تەڭگەسىنەن ايىرىلدى

1765
Adyrna.kz Telegram

تۇركىستان پوليتسەيلەرى تۇرعىندارعا پاتەر الىپ بەرەمىن دەپ 15 ميلليون تەڭگە شىعىن كەلتىرگەن الاياقتى ۇستادى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.

كەنتاۋ قالالىق پوليتسيا بولىمىنە جەرگىلىكتى تۇرعىن ارىزدانىپ كەلگەن. ارىزدانۋشىنىڭ ايتۋىنشا، بۇرىن سوڭدى تانىس ەمەس ەر ادام شىمكەنت قالاسىنان ءۇي الىپ بەرەمىن دەپ 2 500 000 تەڭگەسىن قولما-قول بەرگەنىن، الايدا اراداعى ۋادە ورىندالماعانىن ايتىپ جەتكىزگەن. جالپى جابىرلەنۋشىلەرگە كەلتىرىلگەن شىعىننىڭ كولەمى 15 ميلليون تەڭگەنى قۇرادى.

«ارىزدى پوليتسەيلەر قر قك-ءنىڭ 190-بابى (الاياقتىق) بويىنشا تىركەدى. ءتارتىپ ساقشىلارىنىڭ اتقارعان جەدەل شارالارى ناتيجەسىندە، نەبارى تاۋلىك ىشىندە الاياقتىق جايتىنا قاتىسى بار تۇركىستان قالاسىنىڭ تۇرعىنى ۇستالدى. ول جۇمىسسىز جۇرگەن، بۇرىن سوڭدى وسىنداي الاياقتىق جايتىنا قاتىسى بار ازامات بولىپ شىقتى. اتقارىلعان جۇمىستار بارىسىندا انىقتالعانداي، كۇدىكتى ەر ازامات ءوز ارام ويىن ىسكە اسىرۋ ءۇشىن كەنتاۋ قالاسىنىڭ تۇرعىنىن جولىقتىرىپ، شىمكەنت قالاسىنان ءۇي الىپ بەرەمىن دەگەن جالعان ۋادەسىمەن سەنىمىنە كىرىپ، اقشاسىن الىپ الادى. وسىدان سوڭ ۋادە ورىندالماي، نە اقشا قايتارىلماي 1 جىل بويى جابىرلەنۋشىنى اۋرە-سارساڭعا سالعان»،– دەلىنگەن حابارلامادا.

سونداي-اق كەنتاۋلىق پوليتسەيلەر كۇدىكتى ازاماتتىڭ 13 تۇرعىننان الاياقتىق جولمەن اقشا العانىن انىقتادى. قازىرگى ۋاقىتتا ورتا جاستاعى ازاماتقا قاتىستى سوتقا دەيىنگى تەرگەۋ امالدارى جۇرگىزىلۋدە.

«ادىرنا» ۇلتتىق پورتالى

پىكىرلەر