قازاقستاندىق ۋنيۆەرسيتەتتەرگە اكادەميالىق بوستاندىق بەرىلگەن جانە ەلىمىزدىڭ ەڭبەك نارىعىن قاجەت ءبىلىم باعدارلامالارىن وزدەرى دايىنداي الادى. بىراق جوعارى ءبىلىم سالاسى بيزنەسكە اينالماۋى كەرەك دەپ مالىمدەدى م.س. نارىكباەۆ اتىنداعى كازگيۋ ۋنيۆەرسيتەتىنىڭ باسقارما توراعاسى تالعات نارىكباەۆ.
"بەرىلەتىن ءبىلىم باعاسىنا ساي بولۋى كەرەك. ەگەر ۋنيۆەرسيتەت ساپالى ءبىلىم بەرمەي، مىقتى مامانداردى دايارلاماي، بىراق ول ءۇشىن اقى السا، بۇل الاياقتىق بولىپ ەسەپتەلەدى. سەبەبى ستۋدەنتتەر ول جەردەن ءبىلىم ەمەس، تەك وقىعانى تۋرالى قاعاز الىپ شىعادى. ال بۇل جاستار مەن ولاردىڭ اتا-انالارىن مازاق قىلۋ دەگەن ءسوز", - دەيدى تالعات نارىكباەۆ.
ونىڭ ايتۋىنشا، ءتيىستى داعدىلاردى يگەرمەي، جۇمىسقا تۇرا الماعان ستۋدەنتتەر مەن اتا-انالارى ۋنيۆەرسيتەتتى سوتقا بەرىپ، ازاماتتىق ءىس باستاۋى مۇمكىن. ياعني، وقۋىنا جۇمساعان اقشانى قايتارۋدى تالاپ ەتەدى.
"ادىرنا" ۇلتتىق پورتالى.
