Qazaqstandyq ýnıversıtetterge akademııalyq bostandyq berilgen jáne elimizdiń eńbek naryǵyn qajet bilim baǵdarlamalaryn ózderi daıyndaı alady. Biraq joǵary bilim salasy bızneske aınalmaýy kerek dep málimdedi M.S. Nárikbaev atyndaǵy KAZGIýÝ Ýnıversıtetiniń Basqarma tóraǵasy Talǵat Nárikbaev.
"Beriletin bilim baǵasyna saı bolýy kerek. Eger ýnıversıtet sapaly bilim bermeı, myqty mamandardy daıarlamaı, biraq ol úshin aqy alsa, bul alaıaqtyq bolyp esepteledi. Sebebi stýdentter ol jerden bilim emes, tek oqyǵany týraly qaǵaz alyp shyǵady. Al bul jastar men olardyń ata-analaryn mazaq qylý degen sóz", - deıdi Talǵat Nárikbaev.
Onyń aıtýynsha, tıisti daǵdylardy ıgermeı, jumysqa tura almaǵan stýdentter men ata-analary ýnıversıtetti sotqa berip, azamattyq is bastaýy múmkin. Iaǵnı, oqýyna jumsaǵan aqshany qaıtarýdy talap etedi.
"Adyrna" ulttyq portaly.
