ايگىلى برازيليالىق فۋتبولشى، XX عاسىردىڭ ۇزدىك فۋتبولشىسى پەلە 31 تامىزدا، سەيسەنبى كۇنى تاڭەرتەڭ اۋرۋحاناعا ءتۇستى، دەپ حابارلايدى "ادىرنا" ۇلتتىق پورتالىنىڭ ءتىلشىسى O Dia باسىلىمىنا سىلتەمە جاساپ.
ويىنشى سان-پاۋلۋ قالاسىنداعى البەرت ەينشتەين اتىنداعى اۋرۋحاناعا تۇسكەنى انىقتالدى. دەرەككوزدىڭ حابارلاۋىنشا، 80 جاستاعى سپورتشى ەسىنەن تانىپ قالعان. وقيعانىڭ سەبەبىن انىقتاۋ ءۇشىن فۋتبولشى رەانيماتسيا بولىمىنە جاتقىزىلدى.
كەيىنىرەك سپورتشى ءوزىنىڭ Twitter-دەگى پاراقشاسىندا ەسىن جوعالتپاعانىن جانە ءوزىن جاقسى سەزىنەتىنىن جازدى. ول كوروناۆيرۋستىق پاندەمياعا بايلانىستى بۇرىن بارا الماعان تەكسەرۋدەن ءوتىپ جاتقانىن اتاپ ءوتتى. ءتىپتى الداعى جەكسەنبىدە الاڭعا شىعاتىنىن مالىمدەپ، قالجىڭدادى.
ايتا كەتەيىك، اتى اڭىزعا اينالعان پەلە حالىقارالىق فۋتبول فەدەراتسياسىنىڭ (فيفا) نۇسقاسى بويىنشا ءجۇز جىلدىقتىڭ ويىنشىسى اتانىپ، برازيليا قۇراماسىندا ءۇش رەت الەم چەمپيوناتىن العان.
"ادىرنا" ۇلتتىق پورتالى
