بۇگىن اتىراۋدا جاراتىلىستانۋ باعىتىندا جاڭاشا فورماتتا ءبىلىم بەرەتىن زياتكەر مامانداندىرىلعان مەكتەپ ليتسەي-ينتەرناتى اشىلدى.
ەلىمىز بويىنشا تۇڭعىش اتىراۋدا بوي كوتەرگەن مەكتەپتىڭ اشىلۋ راسىمىنە وبلىس اكىمى ماحامبەت دوسمۇحامبەتوۆ ارنايى قاتىستى.
-اتىراۋ وبلىسىندا ءبىلىم بەرۋدى دامىتۋدىڭ 2021-2022 جىلدارعا ارنالعان جول كارتاسى قابىلداندى. كارتا اياسىندا زياتكەر مەكتەبىنىڭ تۇساۋى كەسىلۋدە. بوي كوتەرگەن ءبىلىم شاڭىراعى تاۋەلسىز ەلىمىزدىڭ زيالى جاستارىنىڭ التىن بەسىگى بولادى دەپ سەنەمىز – دەدى، وبلىس اكىمى ماحامبەت دوسمۇحامبەتوۆ.
تاۋەلسىزدىگىمىزدىڭ 30 جىلدىعىنا وراي، اشىلىپ جاتقان مەكتەپتىڭ كەلەشەگى زور.
"مەكتەپكە ارنالعان وقۋ-باعدارلامالارىن، مەكتەپتەن تىس جۇمىس ىستەيتىن ۇيىرمەلەردىڭ بارلىق باعدارلامالارىن تابىس ەتەتىن بولامىز. بۇل بالالاردىڭ العان بىلىمدەرىن پراكتيكادا پايدالانىپ جان-جاقتى دامۋلارىنا ىقپالى مول بولماق، - دەدى «نازارباەۆ زياتكەرلىك مەكتەبى» دەربەس ءبىلىم بەرۋ ۇيىمدارىنىڭ باسقارما ءتورايىمى كۇلاش شامشيدينوۆا.
500 ورىندىقتى قامتاماسىز ەتەتىن مەكتەپ – ليتسەيىنە، بيىلعى وقۋ جىلىندا 9 - 10 – 11 سىنىپقا 150 وقۋشى قابىلداندى. بولاشاقتا مەكتەپ بازاسىنان جاتاقحانا سالۋ جوسپاردا بار.
"وبلىس، اۋدانداردان دارىندى وقۋشىلاردى قابىلداپ بىلىمدەرىن ارتتىرۋ باستى ماقساتىمىز.مەكتەبىمىز قازاق تىلىندە ساباقتار وتكىزەدى. كەلەر جىلى ءۇش ءتىلدى قامتۋ جوسپاردا بار. قازىرگى تاڭدا ارنايى تەستىلەۋدەن وتكەن 15 مۇعالىم ءبىلىم ورداسىنا قىزمەت ەتەدى. جالپى مەكتەپ بيىلعى جىلى 9 سىنىپ وقۋشىلارىن دا قابىلدادى. كەلەشەكتە مەكتەپ 10-11 سىنىپپەن جۇمىس جاسايدى دەپ اتاپ ءوتتى" زياتكەر مەكتەپ ليتسەيىنىڭ ديرەكتورى نۇرجان قاراتاەۆ.
زياتكەر مەكتەپ ليتسەيى وبلىسىمىزدىڭ جوعارى وقۋ ورىندارى مەن نازارباەۆ زياتكەرلىك مەكتەپتەرىمەن ىنتىماقتاستىق تۋرالى مەماراندۋمعا قول قويدى .
ج. دوسمۇحامەدوۆ اتىنداعى دارىندى بالالارعا ارنالعان وبلىستىق ينتەرناتتا ۇزدىك وقۋشى اتانىپ، ەمتيحاننان جوعارى بالل جيناپ زياتكەر مەكتەپ ليتسەيىنە وقۋعا تۇسكەن ايدا ماكسيموۆنادا ءوز قۋانىشىمەن ءبولىستى.
-العاش وقۋعا تۇسكەنىمدى اكەم تەلەفون سوعىپ حابارلادى. قۋانىشىمدا شەك بولمادى. سەبەبى مەن قالاعان پاندەر وسىندا تەرەڭدەتىلىپ وقىتىلادى، دەدى ول.
وسىلايشا، زياتكەر مەكتەبى بالالاردىڭ جاستايىنان عىلىممەن اينالىسىپ، ءوز جوبالارىن قورعاۋىنا مۇمكىندىك بەرەدى.
