بايزاق اۋدانىندا بولعان وقيعاعا بايلانىستى قۇرىلعان وبلىستىق جەدەل شتابتىڭ جۇمىسى جالعاسۋدا. بۇل تۋرالى جامبىل وبلىسى اكىمدىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
شتاب مۇشەلەرى عىلىمي-زەرتتەۋ قىزمەتكەرلەرىمەن بىرگە ىرگەدەگى 3 ەلدى مەكەندەگى تۇرعىن ۇيلەر مەن الەۋمەتتىك نىسانداردى تۇگەلدەي زەرتتەدى. قازىرگى تاڭدا جوندەۋدى قاجەت ەتەتىن 118 جىلجىمايتىن مۇلىك انىقتالسا، ونىڭ 106-سى تۇرعىن ءۇي، 12-ءسى كوممەرتسيالىق نىسان. بۇل تۋرالى وبلىس اكىمى بەردىبەك ساپارباەۆ باق وكىلدەرىنە بەرگەن سۇحباتىندا جان-جاقتى توقتالدى.
انىقتالعان 106 تۇرعىن ءۇيدىڭ 35-ءسى كۇردەلى جوندەۋدەن وتەتىن بولسا، قالعان 71-ءى جەڭىل زاقىمدالعان، ولار دا قالپىنا كەلتىرىلەدى. بارلىق جۇمىستارعا ۇكىمەت تاراپىنان قارالاتىن جانە قوسىمشا جەرگىلىكتى بيۋدجەت، وڭىردەگى دەمەۋشىلەر قاراجاتتارى جۇمسالادى.
- بۇگىن ءبىر ءۇيدىڭ كۇردەلى جوندەۋ جۇمىستارى باستالسا، قالعان ۇيلەر بويىنشا قۇرىلىسشىلار ەرتەڭنەن باستاپ ىسكە كىرىسەدى. ەكى ايدىڭ ىشىندە بارلىق ءۇيدى قالپىنا كەلتىرەمىز دەپ وزىمىزگە مىندەتتەمە الىپ وتىرمىز. وعان ءبىزدىڭ مۇمكىندىگىمىز دە، قۇرىلىسشىلار كۇشى دە جەتكىلىكتى. الەۋمەتتىك نىساندارعا قاتىستى توقتالساق، 3 مەكتەپكە زاقىم كەلگەن. اسىرەسە، قاتتى زارداپ شەككەنى – جىبەك جولى اۋىلىنداعى ءبىلىم ورداسى. 118 بالا وقيتىن ءبىلىم مەكەمەسىنىڭ ىرگەسى 1956 جىلى قالانعان. ەسكى مەكتەپتىڭ ورنىنا جاڭا عيمارات سالۋعا شەشىم قابىلداندى. اۋىل حالقى سانىنىڭ ءوسىمى ەسكەرىلىپ، ۇكىمەتكە 150 ورىندىق جاڭا مەكتەپتىڭ قۇرىلىسى بويىنشا ۇسىنىس جولدايمىز. سالىناتىن جەر بەلگىلەندى، قۇجاتتارى بارىنشا قىسقا ۋاقىتتا دايىندالادى. جەڭىل زاقىمدالعان ۇشبۇلاق مەن بازارباي اۋىلدارىنداعى مەكتەپتەر دەمەۋشىلەر ەسەبىنەن قالىپقا كەلتىرىلۋدە. ولار ءبىرىنشى قىركۇيەككە دەيىن دايىن بولادى. ءدال سونداي ءبىر مەديتسينالىق پۋنكت تە ءبىر اپتا ىشىندە تولىعىمەن جوندەلەدى،– دەدى وبلىس اكىمى.
وبلىس اكىمىنىڭ ايتۋىنشا، تەمىر جول، اۆتوجولدار قالىپتى رەجيمدە جۇمىس جاساۋدا. تۇرعىنداردىڭ بارلىعى ۇيلەرىنە ورالعان. ۇيلەرى كۇردەلى جوندەۋدەن وتەتىن قاينار اۋىلىنىڭ تۇرعىندارى ۋاقىتشا باسپانامەن، ازىق-تۇلىكپەن قامتاماسىز ەتىلەدى.
قازىرگى تاڭدا تاراز قالالىق ورتالىق اۋرۋحانادا 28 ناۋقاس ەم الۋدا. ونىڭ 4-ءىنىڭ جاعدايى ورتاشا اۋىر. ولارعا قاجەتتى بارلىق مەديتسينالىق كومەكتەر كورسەتىلۋدە. ومىرلەرىنە ەشقانداي قاۋىپ ءتونىپ تۇرعان جوق. ءدارى-دارمەكتەر مەن دارىگەرلەر جەتكىلىكتى.
جالپى، مەديتسينالىق كومەككە جۇگىنگەن ءتۇرلى دەڭگەيدە جاراقات العان 98 ادامنىڭ ىشىندە قاراپايىم تۇرعىندار جوق، بارلىعى اسكەريلەر مەن توتەنشە جاعداي سالاسىنىڭ قىزمەتكەرلەرى.
قازىرگى تاڭدا حابارسىز كەتكەندەر ىزدەستىرىلۋدە. وبلىس اكىمى ولاردىڭ اتا-انالارى مەن تۋعان-تۋىسقاندارىمەن كەزدەسىپ، ءتيىستى تۇسىندىرمە بەردى. ىزدەۋ جۇمىستارىنا اسكەريلەر، تجد ماماندارى، كينولوگتار، ءتيىستى ماماندار، قىزمەتتىك يتتەر، اتتى ادامدار جۇمىلدىرىلعان. ارنايى درون قۇرىلعىسىنىڭ مۇمكىندىگى دە بارىنشا پايدالانىلۋدا. قازىرگى تاڭدا 180 ادام، 40 شاقتى تەحنيكا جۇمىس جاساۋدا.
«ادىرنا» ۇلتتىق پورتالى
