قورعانىس ءمينيسترىنىڭ ورىنباسارى گەنەرال-مايور مۇحامەدجان تالاسوۆ تاراز قالاسىنىڭ ەمدەۋ مەكەمەلەرىن ارالادى. ول ستاتسيوناردا ەمدەلىپ جاتقان ادامداردىڭ حال-جاعدايىمەن تانىستى، دەپ حابارلايدى «ادىرنا» ءتىلشىسى مينيسترلىكتىڭ ءباسپاسوز قىزمەتىنە سىلتەمە جاساپ.
قورعانىس مينيسترلىگىنىڭ جۇمىس توبى قازا تاپقانداردىڭ وتباسىلارىمەن قاجەتتى جۇمىس جۇرگىزۋدە. اتاپ ايتقاندا ولارعا زاڭنامادا بەلگىلەنگەن تولەمدەر مەن جەڭىلدىكتەردى الۋ ءتارتىبى دە تۇسىندىرىلەدى. بۇدان باسقا، مۇحامەدجان تالاسوۆ زارداپ شەككەندەردىڭ ەشقايسىسى نازاردان تىس قالمايتىنىن اتاپ ءوتتى.
- ءبىز ءتيىستى وتەماقىلار مەن جاردەماقىلاردى تولەۋگە بايلانىستى ماسەلەلەردى مۇمكىندىگىنشە تەزىرەك شەشۋ ءۇشىن قولدان كەلگەننىڭ ءبارىن جاسايمىز. قاجەت بولعان جاعدايدا وتباسى مۇشەلەرىنە جۇمىسقا ورنالاسۋعا كومەك كورسەتىلەدى. سونداي-اق قازا تاپقانداردىڭ بالالارىنا قامقورلىق كورسەتەمىز. بۇل رەتتە ولاردى قورعانىس مينيسترلىگىنىڭ ءبىلىم بەرۋ ورىندارىنا وقۋعا قابىلداۋعا جاردەم كورسەتىلەدى، – دەدى قورعانىس ءمينيسترىنىڭ ورىنباسارى.
«ادىرنا» ۇلتتىق پورتالى
