جامبىل وبلىسى، بايزاق اۋدانىندا وق-دارىلەر قويماسىنداعى جارىلىستار سالدارىنان تاعى ءبىر اسكەري قايتىس بولدى، دەپ حابارلايدى "ادىرنا" ۇلتتىق پورتالى قورعانىس مينيسترلىگىنە سىلتەمە جاساپ.
- 2021 جىلعى 7 قىركۇيەكتە تاراز قالالىق اۋرۋحاناسىندا 26 تامىزدا جامبىل وبلىسىنداعى وق-دارىلەر قويماسىندا بولعان ءورتتى ءسوندىرۋ كەزىندە العان جاراقاتتارىنىڭ سالدارىنان 28349 اسكەري ءبولىمىنىڭ اسكەري قىزمەتشىسى 1983 جىلى تۋعان، كاپيتان ەرلان رىسقۇلبەكۇلى قىرعىزاليەۆ قايتىس بولدى - دەلىنگەن حابارلامادا.
ول قويماداعى ءورتتى سوندىرۋگە كىرىسكەن العاشقىلاردىڭ ءبىرى بولىپ، وق-دارىلەردى ساقتاۋ ءبولىمىنىڭ باستىعى لاۋازىمىن اتقارعان.
ەسكە سالايىق، 26 تامىز كۇنى كەشكى ۋاقىتتا جامبىل وبلىسى، بايزاق اۋدانىنىڭ اسكەري بولىمىندەگى قويمالاردىڭ بىرىندە جارىلىس بولعانى حابارلانعان ەدى. سالدارىنان جالپى سانى 16 ادام قازا تاپتى.
"ادىرنا" ۇلتتىق پورتالى
