مەملەكەت باسشىسى قاسىم-جومارت توقاەۆ قازاقستاندىقتاردى كونستيتۋتسيا كۇنىمەن قۇتتىقتادى. قۇتتىقتاۋ ءماتىنى اقوردانىڭ رەسمي سايتىندا جاريالاندى، دەپ حابارلايدى «ادىرنا» ءتىلشىسى.
«قۇرمەتتى وتانداستار!
سىزدەردى كونستيتۋتسيا كۇنىمەن قۇتتىقتايمىن!
اتازاڭىمىز – قاستەرلى تاۋەلسىزدىگىمىزدىڭ سەنىمدى تىرەگى.
كونستيتۋتسيا مەملەكەتىمىزدىڭ زاڭ جۇزىندە جانە ساياسي تۇرعىدان دەموكراتيا قاعيداتتارى مەن زاڭ ۇستەمدىگىن ۇستاناتىنىن ايعاقتايدى. سونداي-اق ۇزاق مەرزىمدى دامۋ باعدارىمىزدى ايقىندايدى.
قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ باستاماسىمەن جانە تىكەلەي اتسالىسۋىمەن ازىرلەنگەن ەلىمىزدىڭ باس قۇجاتى الەۋمەتتىك-ەكونوميكالىق جەتىستىكتەرىمىزدىڭ جانە قوعامدىق ءومىردىڭ بارلىق سالاسىنداعى اۋقىمدى رەفورمالارىمىزدىڭ بەرىك تۇعىرى بولىپ سانالادى.
كونستيتۋتسيامىزدىڭ ۇلاعاتتى ۇستانىمدارى ەكونوميكالىق داعدارىستاردى باتىل ەڭسەرىپ، بولاشاققا سەنىممەن قادام باسۋىمىزعا جول اشادى.
ءبىز ازاماتتاردىڭ قۇقىقتارى مەن بوستاندىقتارىنا كەپىلدىك بەرەتىن مىزعىماس قۇندىلىقتارعا سۇيەنە وتىرىپ، ءادىل مەملەكەت قۇرامىز. باستى ماقساتىمىز – حالىقتىڭ تۇرمىس ساپاسى مەن ءال-اۋقاتىن ارتتىرۋ.
اتازاڭىمىز ەل بىرلىگىن جانە ادامنىڭ ار-ۇجدانى مەن ابىرويىنا قول سۇعۋعا بولمايتىنىن نەگىزدەپ، كەمسىتۋدىڭ كەز-كەلگەن تۇرىنە تىيىم سالۋ ارقىلى ۇلتىمىزدى ۇيىستىرادى. وسى باستى ۇستانىمدار باعا جەتپەس بايلىعىمىز – ىشكى ساياسي تۇراقتىلىقتى قامتاماسىز ەتەدى.
تاۋەلسىزدىك رۋحى ءاربىر جولىندا كورىنىس تاپقان كونستيتۋتسيامىزعا قۇرمەت حالقىمىزعا ءتان وتانشىلدىقتىڭ ارقاۋىنا اينالىپ وتىر.
بارشاڭىزعا زور دەنساۋلىق، باق-بەرەكە جانە مول يگىلىك تىلەيمىن!»— دەدى پرەزيدەنت.
«ادىرنا» ۇلتتىق پورتالى
