Memleket basshysy Qasym-Jomart Toqaev qazaqstandyqtardy Konstıtýııa kúnimen quttyqtady. Quttyqtaý mátini Aqordanyń resmı saıtynda jarııalandy, dep habarlaıdy «Adyrna» tilshisi.
«Qurmetti otandastar!
Sizderdi Konstıtýııa kúnimen quttyqtaımyn!
Atazańymyz – qasterli Táýelsizdigimizdiń senimdi tiregi.
Konstıtýııa memleketimizdiń zań júzinde jáne saıası turǵydan demokratııa qaǵıdattary men zań ústemdigin ustanatynyn aıǵaqtaıdy. Sondaı-aq uzaq merzimdi damý baǵdarymyzdy aıqyndaıdy.
Qazaqstannyń Tuńǵysh Prezıdenti Nursultan Nazarbaevtyń bastamasymen jáne tikeleı atsalysýymen ázirlengen elimizdiń bas qujaty áleýmettik-ekonomıkalyq jetistikterimizdiń jáne qoǵamdyq ómirdiń barlyq salasyndaǵy aýqymdy reformalarymyzdyń berik tuǵyry bolyp sanalady.
Konstıtýııamyzdyń ulaǵatty ustanymdary ekonomıkalyq daǵdarystardy batyl eńserip, bolashaqqa senimmen qadam basýymyzǵa jol ashady.
Biz azamattardyń quqyqtary men bostandyqtaryna kepildik beretin myzǵymas qundylyqtarǵa súıene otyryp, ádil memleket quramyz. Basty maqsatymyz – halyqtyń turmys sapasy men ál-aýqatyn arttyrý.
Atazańymyz el birligin jáne adamnyń ar-ujdany men abyroıyna qol suǵýǵa bolmaıtynyn negizdep, kemsitýdiń kez-kelgen túrine tyıym salý arqyly ultymyzdy uıystyrady. Osy basty ustanymdar baǵa jetpes baılyǵymyz – ishki saıası turaqtylyqty qamtamasyz etedi.
Táýelsizdik rýhy árbir jolynda kórinis tapqan Konstıtýııamyzǵa qurmet halqymyzǵa tán otanshyldyqtyń arqaýyna aınalyp otyr.
Barshańyzǵa zor densaýlyq, baq-bereke jáne mol ıgilik tileımin!»— dedi Prezıdent.
«Adyrna» ulttyq portaly
