ماڭعىستاۋ وبلىسىندا اۋىزسۋ ماسەلەسىن شەشۋ ماقساتىندا بيىل جاڭا جوبالار جۇزەگە اسىرىلۋدا

2101
Adyrna.kz Telegram

ماڭعىستاۋ وبلىسىندا ءوڭىردى اۋىزسۋمەن قامتۋ ماقساتىندا بىلتىر 5 جىلعا ارنالعان جوسپار جاساقتالعان بۇل — وبلىس اكىمى سەرىكباي ترۇموۆتىڭ قىزمەتكە كەلگەننەن كەيىنگى ءبىرىنشى كەزەكتە قولعا العان ءىسى. وبلىستاعى سۋ ماسەلەسى جان-جاقتى زەردەلەنىپ، تىرشىلىك ءنارىنىڭ تاپشىلىعىن جويۋ جولدارى جوسپارلانعان. بيىل وسى جوسپار بويىنشا بىرقاتار جوبا ىسكە قوسىلادى دەپ حابارلايدى "ادىرنا" ۇلتتىق پورتالى ماڭعىستاۋ وبلىسى اكىمىنىڭ ءباسپاسوز قىزمەتىنە سىلتەمە جاساپ.

اتالعان جوبالاردى اتاپ وتسەك:

1. اقتاۋ قالاسى جانە وعان ىرگەلەس ورنالاسقان مۇنايلى، قاراقيا اۋداندارىنىڭ اۋىلدارىن اۋىز سۋمەن جەتكىلىكتى دەڭگەيدە قامتاماسىز ەتۋ ماقساتىندا «كاسپي» سۋ تۇششىتۋ زاۋىتىنىڭ قۋاتىن ەكى ەسە ياعني 40 مىڭ تەكشە مەترگە دەيىن ۇلعايتۋ كوزدەلگەن ەدى. قازىر جۇمىس قارقىندى جۇرگىزىلۋدە. رەسپۋبليكالىق بيۋدجەتتەن 2021 جىلعا دەيىن 1,0 ملرد.تەڭگە ءبولىنىپ تولىقتاي يگەرىلدى. بيىل اتالعان جۇمىستاردى جالعاستىرۋعا تاعى دا 6,7 ملرد.تەڭگە ءبولىنىپ، تامىز ايىندا جەرگىلىكتى بيۋدجەتكە ءتيىستى قاراجات تولىقتاي ءتۇستى. جوبانى 2022 جىلدىڭ باسىندا اياقتاۋ جوسپارلانعان.
2. «قازمۇنايگاز» ۇلتتىق كومپانياسى «قاراجانباس» كەن ورنىندا تاۋلىگىنە 17 مىڭ تەكشە مەتر سۋ تۇششىتاتىن زاۋىت سالىپ جاتىر. بۇل زاۋىت بيىل جىل سوڭىنا ىسكە قوسىلادى دەپ كۇتىلۋدە. وندىرىستەن اۋىسقان سۋ تۇرعىنداردىڭ قاجەتىنە الىناتىن بولادى.


3. «ماەك-قازاتومونەركاسىپ» جشس-نە قاراستى تاۋلىگىنە 24 مىڭ تەكشە مەتر سۋ تۇششىتاتىن قوندىرعىسىن سالۋ جوسپارلانعان. قازىر جوبالىق-سمەتالىق قۇجاتتاماسى جاساقتالۋدا. قۇجات تولىق راسىمدەلىپ بىتكەننەن كەيىن، جوبانى كەلەر جىلى باستاۋ كوزدەلۋدە.
4. فورت-شەۆچەنكو قالاسىندا قۋاتى تاۋلىگىنە 5 مىڭ تەكشە مەتردى قۇرايتىن سۋ تۇششىتۋ قوندىرعىسىن NKOK كومپانياسىنىڭ وبلىس ءۇشىن الەۋمەتتىك قولداۋ اياسىندا ىسكە اسىرۋ جوسپارلانىپ وتىر. وبلىس اكىمىنىڭ باستاماسىمەن جاساقتالعان جوسپارعا سايكەس، ءدال وسىنداي جوبا اقشۇقىر جانە سايىن شاپاعاتوۆ ەلدىمەكەندەرىندە دە سالىنادى.
5. اقشۇقىر اۋىلىندا تەڭىز جاعالاۋىندا 8 قۇدىق ىسكە قوسىلدى.
6. قازمۇنايگاز» ۇلتتىق كومپانياسى تاراپىنان قۇنى 87 ملرد.تەڭگە بولاتىن كەندىرلى ايماعىنان تاۋلىگىنە 50 مىڭ تەكشە مەتر سۋ تۇششىتاتىن زاۋىتتىڭ قۇرىلىسى باستالادى. بۇل جوبا جاڭاوزەن قالاسى تۇرعىندارىن تازا اۋىز سۋمەن قامتيتىن بولادى. اتالعان جۇمىستى ىسكە اسىراتىن جاڭا مەكەمە - “قمگ - اقسۋ” جشس قۇرىلدى. باستاپقى قارجى ءبولىنىپ، قۇجاتتارى راسىمدەلۋدە.
7. مۇنايلى اۋدانىنداعى باياندى اۋىلىندا وتكەن ايدا تاۋلىگىنە 3 مىڭ تەكشە مەتر سۋ تۇششىتاتىن مەمبرانا ىسكە قوسىلدى. بۇدان بولەك، باياندى اۋىلىندا قازىر تۋالىگىنە مىڭ تەكشە مەترگە دەيىن سۋ تۇششىتاتىن مەمبرانا جۇمىس ىستەپ تۇر. اقپان ايىنىڭ باسىندا ىسكە قوسىلعان مەمبرانا «قۇيىلىس» جەراستى سۋ كەنورنىنان كەلگەن سۋدى تۇششىتادى. بۇگىندە ول باياندى اۋىلىن تولىقتاي اۋىز سۋمەن قامتاماسىز ەتىپ وتىر.


8. سونىمەن قاتار “قۇيىلىس - مۇنايلى -اقتاۋ” باعىتىندا جاڭا سۋ قۇبىرى تارتىلادى.
9. وڭىردەگى سۋ كوزدەرىن ىزدەستىرۋ-زەرتتەۋ جۇمىستارى قولعا الىندى. بۇل الداعى جىلدارى وبلىس جۇرتشىلىعىن سۋمەن قامتۋ ءۇشىن ناقتى شارالار قابىلداۋعا مۇمكىندىك بەرەدى دەپ كۇتىلۋدە.

— اتالعان جوبالار ىسكە قوسىلعاندا، جاز ايىندا بولاتىن سۋ تاپشىلىعىن جويىپ، تۇرعىنداردى تىرشىلىك نارىمەن قامتۋعا قول جەتكىزەمىز، — دەيدى وبلىستىق ەنەرگەتيكا جانە تقش باسقارماسىنىڭ باسشىسى ب.قارتباەۆ.

"ادىرنا" ۇلتتىق پورتالى.

پىكىرلەر