قازاقستان قورعانىس سالاسىن دامىتۋ ماقساتىندا نىق قادامدار جاساۋدا. ەلدىڭ ەرتەڭى ءۇشىن اسكەري سالانى دامىتۋدىڭ ماڭىزى اسا زور. سەبەبى اسكەر ەل قورعانى عانا ەمەس، ونىڭ تىنىش دامۋى مەن تۇراقتى ءوسۋىنىڭ كەپىلى. وسى ماقساتتا ەلىمىز ءتۇرلى مەملەكەتتەرمەن كەلىسىم جاساپ، ءوزارا جاتتىعۋلار دا وتكىزىپ تۇرادى. سونداي-اق ايماقتىق جانە حالىقارالىق دەڭگەيدەگى جارىستاردا دا ءوز بەلسەندىلىگىن تۇسىرگەن ەمەس. ۇنەمى ۇزدىكتەر قاتارىنان كورىنىپ، ەڭسەنى بيىك ۇستاپ، رۋحتى اسپانداتۋدىڭ جارقىن ۇلگىسىن كورسەتىپ كەلەدى.
قازاقستان رەسپۋبليكاسى مەن پاكىستان يسلام رەسپۋبليكاسى اراسىندا ونداعان جىلدار بويى اسكەري سالادا تاجىريبە الماسۋ جالعاسىپ كەلەدى. پاكىستان قورعانىس سالاسى دامىعان، اسكەري تەحنيكانى جاساقتاي بىلگەن جانە يادرولىق قارۋعا يە قۋاتتى مەملەكەت.
جاقىندا سونداي جاتتىعۋدىڭ ءبىرى ءوتتى. قازاقستان رەسپۋبليكاسى مەن پاكىستان يسلام رەسپۋبليكاسى قارۋلى كۇشتەرىنىڭ ارنايى كۇشتەرىمەن بىرلەسكەن «DOSTARYM-2021»ارنايى تاكتيكالىق وقۋ-جاتتىعۋى پاببي قالاسىنداعى تەرروريزمگە قارسى ۇلتتىق ورتالىق پەن «مەرگەندەر مەكتەبىندە» وتۋدە.
قازاقستان تاراپىنان «شىعىس» وڭىرلىك قولباسشىلىعىنىڭ بولىمشەلەرى قاتىسىپ جاتىر. جاتتىعۋ كەزىندە ەكى ەلدىڭ اسكەري قىزمەتشىلەرى ەلدى مەكەندەردە زاڭسىز قارۋلى توپتارعا قارسى تۇرۋ ماسەلەلەرىن پىسىقتاپ جاتىر. اتاپ ايتقاندا، شارتتى تۇردە زاڭسىز قارۋلى قۇرالىمداردى انىقتاۋ، بۇعاتتاۋ جانە جويۋ بويىنشا شارالار ىسكە اسۋدا. بۇل حالىقارالىق دەڭگەيدە تەررورلىق توپتار كۇشىنە ەنگەن ساتتە اسا قاجەت بولىپ وتىر.
باستاپقى كەزەڭدە اسكەري كونتينگەنتتەر ۇيلەستىرۋ مەن ءوزارا ارەكەتتەسۋ ماسەلەلەرىن پىسىقتاپ، بىرلەسكەن ارنايى وپەراتسيا وتكىزەدى، سودان كەيىن ولار تىكەلەي بارلاۋ مەن جاۋىنگەرلىك وپەراتسيالارعا كوشەدى. وقۋ-جاتتىعۋعا ەكى ەلدەن 50-دەن استام اسكەري قىزمەتشى، 20-عا جۋىق اسكەري جانە ارنايى تەحنيكا قاتىسۋدا. ايتا كەتەيىك، 2019 جىلى بىرلەسكەن وقۋ-جاتتىعۋ قازاقستان اۋماعىندا وتكەن بولاتىن.
قازاقستان ءتۇرلى اسكەري جاتتىعۋلارعا دا قاتىسۋدى ارتتىرىپ كەلەدى. حالىقارالىق ارميا ويىندارىنىڭ «تەڭىز كۋبوگى» باسەكەسىندە قازاقستاندىق تەڭىزشىلەر تەڭىز كەمەلەرىن امان ساقتاپ قالۋ ءۇشىن كۇرەستە ءبىرىنشى ورىندى يەلەندى. يراندىق ەكيپاج ءبىزدىڭ جاۋىنگەرلەرمەن كوشباسشىلىقتى ءبولىستى. ۇزدىك ناتيجەنى قازاقستان قۇراماسى جانە ءبىرىنشى كەزەڭدەگى ءۇش جاتتىعۋدىڭ ناتيجەسى بويىنشا «سۇڭقار» سايىسىندا دا كورسەتتى. قازاقستاندىق اسكەري قىزمەتشىلەرمەن ءبىرىنشى ورىندى رەسەي قۇراماسى دا يەمدەندى.
ارمەنيادا وتكەن «بەيبىتشىلىك جاۋىنگەرى» بايقاۋىنا قاتىسۋشىلار «كاسىبي» كەزەڭنىڭ ەكى جاتتىعۋىن ورىندادى. قازاقستاندىق كوماندانىڭ وكىلى اعا سەرجانت دارحان اسلان بارلىق باسەكەلەستەرگە قاراعاندا كەدەرگىلەردەن جىلدامىراق ءوتىپ، ياعني 6 مينۋت 17 سەكۋندتا تاپسىرمانى ءساتتى ورىنداپ، ۇزدىك اتاندى.
ءۇش جارىس كۇنىنىڭ قورىتىندىسى بويىنشا رەسەي كوش باستاپ تۇر، ەكىنشى ورىندى قازاقستاندىق اسكەري قىزمەتكەرلەر الۋدا. الەمنىڭ الپاۋىتتارى قاتىسىپ جاتقان سايىستا مۇنداي كورسەتكىشكە تابان تىرەۋ وتە ۇلكەن جەتىستىك بولىپ تابىلاتىنى انىق.
ال تاعى ءبىر سايىس «Elbrus Ring» بايقاۋىنىڭ ءبىرىنشى كەزەڭىنىڭ قورىتىندىسى بويىنشا قازاقستان ەكىنشى ورىندا، رەسەي قۇراماسى كوش باسىندا، وزبەكستان ءۇشىنشى ورىندا تۇر. ءبىرىنشى كەزەڭدە قاتىسۋشىلار جاساندى تاۋلى ايماققا ورمەلەۋدەن، تاۋلارداعى كەدەرگىلەردەن ءوتۋ جانە اتۋ ورىنداۋ بويىنشا بەس ءتۇرلى ارنايى تاپسىرمانى ورىندادى. بۇل ارادا حالىقارالىق ارميا ويىندارىنىڭ باسقا جارىستارىنداعى جارىستار جالعاسۋدا. كۇرەستىڭ قارقىندىلىعى، سونىمەن قاتار ءار كوماندانىڭ جەڭىسكە دەگەن ۇمتىلىسى ارتىپ كەلەدى.
«تانك بياتلونى» جەكە جارىستاعى جەتىستىك، «الەم جاۋىنگەرىنىڭ» اسكەري-كاسىبي كەزەڭىندەگى كوشباسشىلىق جانە «سۇڭقاردىڭ» اۋەدەگى بارلاۋداعى جەتىستىكتەرى - بۇل حالىقارالىق ارميا ويىندارىنىڭ كەزەكتى باسەكەلى كۇنىنىڭ ناتيجەسى بولىپ وتىر دەۋگە تولىق نەگىز بار.
ماسكەۋ تۇبىندەگى «الابينو» اسكەري جاتتىعۋ كەشەنىندە كاپيتان ابدۋلحاكيم دۇيسەنوۆ، 3 -دارەجەلى سەرجانت سۇڭعات سادۋاقاسوۆ پەن اعا سەرجانت دۋمان بايجانوۆتان تۇراتىن العاشقى قازاقستاندىق ەكيپاج جوعارى كاسىبي شەبەرلىكتەرىن كورسەتتى. تانك بياتلونى بويىنشا جەكە جارىستا جەڭىسكە جەتتى. قازاقستاندىقتار ازەربايجان، بەلارۋس جانە سەربيا قارسىلاستارىنان سەنىمدى تۇردە وزىپ، بارلىق نىساندارعا ءجوپ ءتيدى جانە كەدەرگىلەردى تالاپقا ساي ەڭسەرىپ شىقتى.
ريازاندا اۋە دەسانتتىق ۆزۆودىنىڭ قاتىسۋشىلارى كەلەسى كەزەڭدە قويان-قولتىق ۇرىستا كەزدەستى. قازاقستان وكىلى، ەفرەيتور ولجاس ەرجان 70 كەلىگە دەيىنگى سالماقتا ەكىنشى ورىندى، ءۇشىنشى ورىندى 70-تەن 80 كەلىگە دەيىن كاپيتان جاسۇلان مۇسەركەنوۆ يەلەندى. مەيىرجان قوجانتاەۆ ءسوزسىز جەڭىسكە جەتتى. قول قويان جەكپە-جەكتىڭ قورىتىندىسى بويىنشا رەسەي قۇراماسى ءبىرىنشى ورىندى، ەكىنشى ورىندى قازاقستان، ءۇشىنشى ورىندى بەلارۋس يەلەندى.
جاۋىنگەرلىك جاتتىعۋلار جيىنتىعىن «الەم جاۋىنگەرى» بايقاۋىنىڭ قاتىسۋشىلارى ءبىرىنشى كەزەڭدە ورىندادى. ول لابيرينتتەر مەن توسقاۋىلداردان وتۋدەن ورتكە قارسى دايىندىق پەن حيميالىق قورعانىس ستاندارتتارىن ورىنداۋعا دەيىنگى ون بەس ءتۇرلى جاتتىعۋلاردى قامتىدى. اسكەري-كاسىبي كەزەڭنىڭ ۇزدىكتەرى قازاقستاننىڭ اسكەري قىزمەتشىلەرى، بەلارۋس قۇراماسىنىڭ وكىلدەرى - ەكىنشى ورىندا، ۇشىنشىدە - رەسەي قۇراماسى الدى.
قازاقستاندىق اسكەري قىزمەتشىلەر «Falconry» ۇشقىشسىز ۇشۋ اپپاراتتارىنىڭ ەكيپاجدارىنىڭ بايقاۋىندا اۋەدەگى بارلاۋدا ۇزدىك بولدى. قازاقستاندىق كوماندا بەلارۋس پەن رەسەيدەن قاتىسۋشىلاردى ارتقا تاستاپ، بارلىق تابىلعان نىسانداردى وبەكتيۆتى باقىلاۋدىڭ ەڭ جاقسى ۋاقىتى مەن ەڭ تولىق ماتەريالدارىن كورسەتتى.
وسىلايشا قازاقستاندىق قۇراما اسكەري سايىستاردىڭ بارلىق سالاسىندا، اۋە، قۇرلىق، تەڭىزدە ۇزدىك اتانىپ، ءوز ايبىنى مەن قۋاتىن دالەلدەي ءبىلدى.
"ادىرنا" ۇلتتىق پورتالى
