ماڭعىستاۋ وبلىسىنىڭ بورجاقتى ەلدى مەكەنىندە كەنە قاپتادى. جيىرماعا جۋىق شارۋانىڭ قوراسىنان زيانكەستەر شىعىپ، مال زارداپ شەگىپ جاتىر. شارۋالار بۇل قۇرعاقشىلىق پەن ءتورت تۇلىككە جەم-ءشوپتىڭ جەتىسپەۋشىلىگىنەن تۋىنداعان جاعداي دەپ وتىر، دەپ حابارلايدى كتك.
«بەس بوتانىڭ ولگەن سەبەبى كەنەنىڭ كەسىرى. قازىر مىنا جىعىلعانعا جۇدىرىق دەپ كەنە دە قاپتاپ كەتتى. كەنە ول جەردىڭ جاماندىعىنان عوي بۇل قۇرعاقشىلىقتان سودان پايدا بولادى. سوسىن ونىڭ ۇستىنە مىنا مال دا ارىق بۇلار دا بويىنا ينفەكتسيا العىش. كەنە دە سول ارىق مالعا جابىسادى. اۋرۋدىڭ ءبارى مالى ارىق مالعا جابىسادى»، - دەيدى شارۋا بەردىحان الەنوۆ.
شارۋالاردىڭ ايتۋىنشا كەنە كوتەرەم مالعا ءۇيىر بولادى. الەۋمەتتىك جەلىگە سالىنعان مىنا ۆيدەودا قاپتاعان كەنەلەردىڭ تۇيەنى ساۋعا مۇرشا بەرمەي جاتقانىن كورۋگە بولادى. ۇساق جاندىكتەر مالدىڭ قانىن سورىپ، ءتۇرلى اۋرۋ جۇقتىرىپ اقىر سوڭىندا ءولتىرىپ تىناتىن كورىنەدى. شارۋالار كەنەدەن ارىلۋ ءۇشىن قورالارىن 2-3 كۇن سايىن ۋلاپ جاتقانىن ايتىپ وتىر. بىراق زيانكەستىڭ كەتەتىن ءتۇرى جوق. ال ۆەتەريناريا باسقارماسىنداعىلار كەنەدەن قۇتىلۋ ءۇشىن مالدىڭ قىستاپ شىققان قوراسىن ۋاقىتىلى تازالاۋ كەرەكتىگىن جەتكىزدى. الايدا، كەنەنى ۋلاۋعا ارنايى قارجى بولىنبەيدى ەكەن.
«كەنەلەۋ بۇل جاڭاعى مالدىڭ قوراسىن مەحانيكالىق تازالاماۋدان، دەزينفەكتسيالاماۋدان جانە دە ءارتۇرلى ەتنو-ەكزوپارازيتتەرگە قارسى ەگىلمەۋىنەن بولاتىن جاعداي. نەگىزى كەنەلەر كوبىنە قۇمدى جەردە ءومىر سۇرەدى. ەتنوپارازيتتەردىڭ كوبەيۋىنىڭ نەگىزگى سەبەبى - ول مالدى ءبىر ورىندا جىل ون ەكى اي بويى ۇستاۋ. قورانى دەزينفەكتسيالاماۋ. دەزينفەكتسيالاۋدىڭ الدىندا ءبىرىنشى مەحانيكالىق تازالاۋ كەرەك»، - دەيدى ماڭعىستاۋ وبلىستىق ۆەتەريناريا باسقارماسىنىڭ ەپيزووتيالىق قاۋىپسىزدىك ءبولىمىنىڭ باس مامانى ادىلەت قازتۇرعىن.
