ءلاززات قوجاحمەت: كورەيادا جۇرگەن قازاقستاندىقتاردىڭ 90%-ى ايەلدەر

2749
Adyrna.kz Telegram

كورەيادا 35 مىڭعا جۋىق قازاقستاندىق تۇرىپ جاتىر دەگەن بولجام بار. ولاردىڭ ءبىرازى تۋريستىك ۆيزامەن بارىپ قارا جۇمىسقا قالىپ قويعاندار. كورەياعا بارسا اقشانى كوپىرتىپ تابادى دەگەن اڭىزعا سەنىپ اھ ۇرىپ قالعاندار اقيقاتتى ايتا قويمايدى.

كورەيادا جۇرگەن قازاقستاندىقتاردىڭ 90 پايىزى ايەل قاۋىمى. سالىستىرىپ ايتساق، وندا جۇرگەن وزبەك اعايىنداردان كورەياعا نان تابۋعا تازا ەر ادامدار اتتانسا، ال ءبىز جاقتان بارعانداردىڭ باسىم بولىگى ايەل ادامدار.

شەتەل اسقان نازىك جاندىلار جەڭىل جۇمىس ىزدەپ كەتكەن جوق. تاڭنان كەشكە دەيىن اياعىنان تىك تۇرىپ قارا جۇمىسقا جەگىلەتىندەرىن ءبىلىپ كەتتى.
ەر ادام تابيعاتىنان تاۋەكەلشىل كەلەدى. ال ايەل ادامعا بوتەن ەلدە قۇقىقسىز جۇرۋگە بەل شەشۋ — نەسيە قۇلدىعىنان قۇتىلامىن، بالالارىمنىڭ جىرتىعىن تۇگەندەيمىن دەگەن انالىق ينستينكتەن تۋعان جانكەشتىلىك. سول كورەياعا كەتكەن ايەلدەردىڭ ىلۋدە شالۋىندا بولماسا، كوبىسىندە ۇيىندە كۇتىپ وتىرعان جارى جوق. بولسا تەنتىرەر مە ەدى؟

بىلتىر، ەسىن جوعالتقان ايەلدىڭ قازاقستانعا قالاي قايتارىن بىلمەي كورەيانىڭ اەروپورتىن ءبىر اپتا كەزگەنى تۋرالى اقپارات شىقتى. جاس بوسانا سالىپ كورەياعا كەتكەن. بالا-شاعاسىن اسىرايمىن دەپ كەتىپ، باۋىرىنداعى بالاسىن جاتقا جاۋتاڭداتقان ءالى قانشا ايەل بار.
قاراعاندىدان دا از ادام كەتكەن جوق. بەس بالاسىن تۋىستارىنا تاستاپ، ءبىر جارىم جىلدان سوڭ زورعا ورالعان، اعىلشىن تىلىندە ساباق بەرەتىن ماماندىعىن كورەياداعى داياشىلىققا ايىرباستاعان ايداي سۇلۋ قىزدار دا بار.
ولاردىڭ بارلىعىنىڭ كۇتكەن ءۇمىتى اقتالدى ما؟
بىرىنشىدەن العاشقى جارتى جىل لايىقتى جۇمىس ىزدەۋمەن وتەدى. ەشكىم جالاقىسى جوعارى جۇمىس دايىنداپ وتىرمايدى. بۇل جاقتاعى دەلدالداردىڭ ماقساتى الداپ-سۋلاپ قويا بەرۋ. ول جاققا بارۋ ءۇشىن دە قولدا ميلليونداعان تەڭگە بولۋ كەرەك، ونى نەسيەگە راسىمدەپ كەتەدى. بارعاننان كەيىن ول اقشانى تاپپاي تاعى قايتا المايدى. باراتىن اقشا جۇمىس تاۋىپ بەرەتىن دەلدالعا، تۋريستىك ۆيزا راسىمدەۋگە، ون كۇندىك قوناقۇي مەن بارىپ-قايتۋ ۇشاق بيلەتىنە كەتەدى. قوناقۇي مەن قايتاتىن بيلەتتىڭ اقشاسى كۇيىپ كەتەدى.

قازاقستاندىقتار كورەياعا تەك تۋريستىك ۆيزامەن بارا الادى. ەڭبەك ۆيزاسى بەرىلمەيدى. ال وزبەكستاندىقتار كورەياعا زاڭدى تۇردە، ەڭبەك ۆيزاسىمەن بارادى، سول سەبەپتى كورەيادا ەركىن جۇرەدى، جالاقىسى جوعارى جۇمىسقا تۇرادى. قازاقستاندىقتار تىعىلىپ بارعاندىقتان قولايلى جۇمىستى كوپ ىزدەيدى، قالادان قالاعا كوشىپ جۇرەدى، جالاقىسى جاقسى بولسا، جۇمىسى اۋىر، جۇمىسى جەڭىل بولسا تابىسى ماردىمسىز.
كليمات سىز بولعاندىقتان، جاتىن ورىن سالقىن. تاماقتان تارشىلىق جوق. زاڭسىز ميگرانتسىڭ دەپ ەشكىم مۇقاتپايدى. بۇل ەلدە اركىم ءوزىن قاۋىپسىز سەزىنەدى. ىزدەۋشىڭ جوق دەپ باسىنبايدى، اقىڭدى جەمەيدى، تەڭ قارايدى. حالقى وتە ءىلتيپاتتى، كۇلىپ ءجۇرىپ ىستەتەدى جۇمىستى. تەك جۇمىستارى اۋىر. ميگرانتتار تاڭعى بەستەن كەشكى بەسكە دەيىن تىك تۇرىپ جۇمىس ىستەيدى. مۇنداي جۇمىسقا كوپ ءتوزۋ مۇمكىن ەمەس. سول سەبەپتى باسقا جۇمىس ىزدەيدى. باسقا قالا، باسقا مەكەنگە كوشەدى. تاپقان اقشا ءۇي جالداۋعا، اراسىنداعى ۇزىلىستەردە كۇن كورۋگە كەتەدى. كەيبىرى تاپقان اقشانى تىكەلەي قازاقستانعا اۋدارا المايدى. بىرەۋلەر ارقىلى سالىپ جىبەرەدى، بالتىرى سىزداسا دارىگەرگە كورىنە المايدى.

ول جاقتا حالىقتىڭ ءومىر ءسۇرۋ جاسى ۇزاق. قىرقىلجىڭ بولعانشا وتباسىن قۇرمايدى. 60-70-تەگى قاريالار تاڭنان كەشكە دەيىن شارشاماي پلانتاتسيادا ءونىم جيناپ جۇرەدى. بىزدىكىلەر الپىسىندا قاجىپ وتىرعاندا، ول جاقتا ءومىر قىرىقتان كەيىن باستالادى دەسەدى. قاريا بولعانشا شالدىقپاي جۇمىسقا جەگىلگەن كورەيلىكتەر ميگرانتتاردى دا وزدەرىندەي كورەدى. ميگرانتتارعا بوس ۋاقىت قالدىرمايدى، جۇمىستان باس كوتەرتپەيدى. مۇنداي جۇكتەمەگە كوبىسى شىدامايدى. سول سەبەپتى ولار جالاقىسى جوعارى جۇمىستا دا تۇراقتاي بەرمەيدى.
كورەياعا كەتكەن قازاقستاندىقتاردىڭ جوسپارىن ىندەت كۇل-تالقان قىلدى. پاندەميا ول ەلدەگى بيزنەستى دە داعدارىسقا ۇشىراتتى. مەيرامحانالاردىڭ تابىسى ازايعان. پلانتاتسيا ماۋسىمدىق جۇمىس. سايكەسىنشە ونداعى قازاقستاندىقتاردىڭ بۇگىنگى ناپاقاسى ماردىمسىز. قايتايىن دەسە جينالعان قاراجات از ءارى ايىپپۇل ارقالايمىز با دەگەن قورقىنىش بار. جول قاتىناسى بىردە اشىق، بىردە جابىق.
كورەياداعى قازاقستاندىقتارعا ەڭبەك ۆيزاسى بەرىلسە، قۇرلىقتىڭ ار جاعىندا جاۋتەڭدەگەن تالاي تاعدىر وتانىنا ورالار ەدى.

پىكىرلەر