Koreiada jürgen qazaqstandyqtardyŋ 90%-y äielder

Koreiada 35 myŋǧa juyq qazaqstandyq tūryp jatyr degen boljam bar. Olardyŋ bırazy turistık vizamen baryp qara jūmysqa qalyp qoiǧandar. Koreiaǧa barsa aqşany köpırtıp tabady degen aŋyzǧa senıp ah ūryp qalǧandar aqiqatty aita qoimaidy. Koreiada jürgen qazaqstandyqtardyŋ 90 paiyzy äiel qauymy. Salystyryp aitsaq, onda jürgen özbek aǧaiyndardan Koreiaǧa nan tabuǧa taza er adamdar attansa, al bız jaqtan barǧandardyŋ basym bölıgı äiel adamdar. Şetel asqan näzık jandylar jeŋıl jūmys ızdep ketken joq. Taŋnan keşke deiın aiaǧynan tık tūryp qara jūmysqa jegıletınderın bılıp kettı. Er adam tabiǧatynan täuekelşıl keledı. Al äiel adamǧa böten elde qūqyqsyz jüruge bel şeşu — nesie qūldyǧynan qūtylamyn, balalarymnyŋ jyrtyǧyn tügendeimın degen analyq instinkten tuǧan jankeştılık. Sol Koreiaǧa ketken äielderdıŋ ılude şaluynda bolmasa, köbısınde üiınde kütıp otyrǧan jary joq. Bolsa tentırer me edı? Byltyr, esın joǧaltqan äieldıŋ Qazaqstanǧa qalai qaitaryn bılmei Koreianyŋ aeroportyn bır apta kezgenı turaly aqparat şyqty. Jas bosana salyp Koreiaǧa ketken. Bala-şaǧasyn asyraimyn dep ketıp, bauyryndaǧy balasyn jatqa jautaŋdatqan älı qanşa äiel bar. Qaraǧandydan da az adam ketken joq. Bes balasyn tuystaryna tastap, bır jarym jyldan soŋ zorǧa oralǧan, aǧylşyn tılınde sabaq beretın mamandyǧyn Koreiadaǧy daiaşylyqqa aiyrbastaǧan aidai sūlu qyzdar da bar. Olardyŋ barlyǧynyŋ kütken ümıtı aqtaldy ma? Bırınşıden alǧaşqy jarty jyl laiyqty jūmys ızdeumen ötedı. Eşkım jalaqysy joǧary jūmys daiyndap otyrmaidy. Būl jaqtaǧy deldaldardyŋ maqsaty aldap-sulap qoia beru. Ol jaqqa baru üşın de qolda milliondaǧan teŋge bolu kerek, ony nesiege räsımdep ketedı. Barǧannan keiın ol aqşany tappai taǧy qaita almaidy. Baratyn aqşa jūmys tauyp beretın deldalǧa, turistık viza räsımdeuge, on kündık qonaqüi men baryp-qaitu ūşaq biletıne ketedı. Qonaqüi men qaitatyn bilettıŋ aqşasy küiıp ketedı. Qazaqstandyqtar Koreiaǧa tek turistık vizamen bara alady. Eŋbek vizasy berılmeidı. Al özbekstandyqtar Koreiaǧa zaŋdy türde, eŋbek vizasymen barady, sol sebeptı Koreiada erkın jüredı, jalaqysy joǧary jūmysqa tūrady. Qazaqstandyqtar tyǧylyp barǧandyqtan qolaily jūmysty köp ızdeidı, qaladan qalaǧa köşıp jüredı, jalaqysy jaqsy bolsa, jūmysy auyr, jūmysy jeŋıl bolsa tabysy mardymsyz. Klimat syz bolǧandyqtan, jatyn oryn salqyn. Tamaqtan tarşylyq joq. Zaŋsyz migrantsyŋ dep eşkım mūqatpaidy. Būl elde ärkım özın qauıpsız sezınedı. Izdeuşıŋ joq dep basynbaidy, aqyŋdy jemeidı, teŋ qaraidy. Halqy öte ıltipatty, külıp jürıp ıstetedı jūmysty. Tek jūmystary auyr. Migranttar taŋǧy besten keşkı beske deiın tık tūryp jūmys ısteidı. Mūndai jūmysqa köp tözu mümkın emes. Sol sebeptı basqa jūmys ızdeidı. Basqa qala, basqa mekenge köşedı. Tapqan aqşa üi jaldauǧa, arasyndaǧy üzılısterde kün köruge ketedı. Keibırı tapqan aqşany tıkelei Qazaqstanǧa audara almaidy. Bıreuler arqyly salyp jıberedı, baltyry syzdasa därıgerge körıne almaidy. Ol jaqta halyqtyŋ ömır süru jasy ūzaq. Qyrqyljyŋ bolǧanşa otbasyn qūrmaidy. 60-70-tegı qariialar taŋnan keşke deiın şarşamai plantasiiada önım jinap jüredı. Bızdıkıler alpysynda qajyp otyrǧanda, ol jaqta ömır qyryqtan keiın bastalady desedı. Qariia bolǧanşa şaldyqpai jūmysqa jegılgen koreilıkter migranttardy da özderındei köredı. Migranttarǧa bos uaqyt qaldyrmaidy, jūmystan bas kötertpeidı. Mūndai jüktemege köbısı şydamaidy. Sol sebeptı olar jalaqysy joǧary jūmysta da tūraqtai bermeidı. Koreiaǧa ketken qazaqstandyqtardyŋ josparyn ındet kül-talqan qyldy. Pandemiia ol eldegı biznestı de daǧdarysqa ūşyratty. Meiramhanalardyŋ tabysy azaiǧan. Plantasiia mausymdyq jūmys. Säikesınşe ondaǧy qazaqstandyqtardyŋ bügıngı näpaqasy mardymsyz. Qaitaiyn dese jinalǧan qarajat az ärı aiyppūl arqalaimyz ba degen qorqynyş bar. Jol qatynasy bırde aşyq, bırde jabyq. Koreiadaǧy qazaqstandyqtarǧa Eŋbek vizasy berılse, qūrlyqtyŋ ar jaǧynda jäuteŋdegen talai taǧdyr otanyna oralar edı.