گرينپيس ساراپشىلارى جاھاندىق جىلىنۋدىڭ تسەلسي بويىنشا 1,5 گرادۋسقا كوتەرىلۋى تىنىق مۇحيتى ارالدارىنىڭ كەيبىر ايماقتارى ءۇشىن اپات بولاتىنىن ەسكەرتتى.
عالىمداردىڭ ايتۋىنشا، بۇل ايماق ەلدەرى ۇزاق ۋاقىت بويى تەڭىز تولقىنى، قۋاتتى تسيكلون، قۇرعاقشىلىق پەن جەر استى سۋلارىنىڭ تۇزدانۋىنان زارداپ شەكتى. اۋىل شارۋاشىلىعىنا وراسان زور زيان كەلگەن. بۇعان قوسا، تەڭىز دەڭگەيىنىڭ كوتەرىلۋىنە بايلانىستى كوپتەگەن ارالدار سۋ استىندا قالدى. عالىمداردىڭ ايتۋىنشا، بۇل كاتاكليزمدەر پلانەتا جىلىنعان سايىن ارتا بەرمەك.
«تىنىق مۇحيتى ارالدارى جاھاندىق جىلىنۋدان قاتتى زارداپ شەگۋى مۇمكىن. ءبىز تەڭىز دەڭگەيىنىڭ كوتەرىلۋىنە كۋا بولىپ وتىرمىز، ول جالعاسا بەرمەك. كيريباتي، ۆانۋاتۋ جانە سولومون ارالدارى سياقتى ەلدەر ءومىر سۇرۋگە جارامسىز بولماق»، - دەدى اۋستراليانىڭ تىنىق مۇحيتىن زەرتتەۋ جونىندەگى ديرەكتورى نيكولا كازۋلە.
ءبىر كۇن بۇرىن بۇۇ كليماتتىڭ وزگەرۋى جونىندەگى ۇكىمەتارالىق توبى (IPCC) ەسەپ جاريالادى، وعان سايكەس جەر 2030 جىلى تسەلسي بويىنشا 1,5-2 گرادۋس سىني تەمپەراتۋرالىق شەكتى ەڭسەرەدى.
"ادىرنا" ۇلتتىق پورتالى
