16-17 تامىزدا قازاقستان پرەزيدەنتى قاسىم-جومارت توقاەۆ پرەزيدەنت مۋن چجە ءيننىڭ شاقىرۋىمەن كورەيا رەسپۋبليكاسىنا مەملەكەتتىك ساپارمەن بارادى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي حابارلادى.
«ساپار اياسىندا جوعارى دەڭگەيدە كەلىسسوزدەر ءوتىپ، مەملەكەتتەر باسشىلارى ەكى ەل اراسىنداعى ستراتەگيالىق ارىپتەستىكتى ودان ءارى دامىتۋدىڭ پەرسپەكتيۆالارىن قاراستىرماق. كەزدەسۋ قورىتىندىسى بويىنشا بىرلەسكەن مالىمدەمە قابىلدانىپ، ۇكىمەتارالىق قۇجاتتارعا قول قويىلادى دەپ جوسپارلانعان»،–دەپ جازدى ول.
قازاقستان پرەزيدەنتى سەۋلگە ساپارى اياسىندا كورەيانىڭ ءىرى كومپانيالارىنىڭ باسشىلارىمەن، بەلگىلى ساياسي قايراتكەرلەرمەن كەزدەسۋلەر وتكىزەدى. سونىمەن قاتار قازاقستانداعى ينۆەستيتسيالىق جوبالاردى جۇزەگە اسىرۋ بويىنشا بىرقاتار كوممەرتسيالىق كەلىسىم-شارت جاسالماق.
سونداي-اق پرەزيدەنت قاسىم-جومارت توقاەۆ سەۋل قالاسىندا اباي ەسكەرتكىشىنىڭ اشىلۋ راسىمىنە قاتىسادى دەپ جوسپارلانعان.
«ادىرنا» ۇلتتىق پورتالى
