زاڭناما بازاسىن جەتىلدىرۋ شەڭبەرىندە قر ەڭبەك جانە حالىقتى الەۋمەتتىك قورعاۋ ءمينيسترى مىندەتىن اتقارۋشىنىڭ «حالىقتى الەۋمەتتىك قورعاۋ جانە جۇمىسپەن قامتۋ ۇيىمدارىنىڭ باسشىلارى، ماماندارى مەن باسقا دا قىزمەتشىلەرى لاۋازىمدارىنىڭ ۇلگىلىك بىلىكتىلىك سيپاتتامالارىن بەكىتۋ تۋرالى» № 360 بۇيرىعىنا وزگەرىستەر ەنگىزىلدى، دەپ حابارلايدى «ادىرنا» ءتىلشىسى مينيسترلىكتىڭ ءباسپاسوز قىزمەتىنە سىلتەمە جاساپ.
ول كورسەتىلەتىن قىزمەتتەردىڭ ساپاسىن ەداۋىر جاقسارتۋعا مۇمكىندىك بەرمەك.
ەستەرىڭىزگە سالا كەتەسەك، مەديتسينالىق-الەۋمەتتىك مەكەمەلەردىڭ ديرەكتورلارىنا قويىلاتىن بىلىكتىلىك تالاپتارىن قايتا قاراۋ تۋرالى ۇسىنىس 2021 جىلعى اقپاندا ادام جانە بالا قۇقىقتارى جونىندەگى ۋاكىلدەردىڭ، قوعامدىق بىرلەستىكتەر مەن جەرگىلىكتى اتقارۋشى ورگاندار وكىلدەرىنىڭ قاتىسۋىمەن، الەۋمەتتىك جۇمىستىڭ باسىم باعىتتارى ماسەلەلەرى جونىندەگى ۆەدومستۆوارالىق كەڭەستىڭ وتىرىسىندا ايتىلعان بولاتىن. شاراعا قاتىسۋشىلار قازاقستاندا ساۋاتتى، تاجىريبەلى باسشىلار بار ەكەنىن، الايدا بىلىكتىلىك تالاپتارىنا بايلانىستى ولاردى ءمام ديرەكتورلارى لاۋازىمىنا بەكىتۋگە مۇمكىندىك جوق ەكەنىن اتاپ ءوتتى.
جاقىن جانە الىس شەتەلدەردىڭ تاجىريبەسى مەديتسينالىق-الەۋمەتتىك مەكەمەلەردىڭ ديرەكتورلارى لاۋازىمىنا باسقا سالالاردا باسشىلىق لاۋازىمداردا جۇمىس تاجىريبەسى بار قىزمەتكەرلەر تاعايىندالاتىنىن كورسەتەدى.
№ 360 بۇيرىققا ەنگىزىلگەن وزگەرىستەرگە سايكەس، ەندى، ءمام ديرەكتورى لاۋازىمىنا ءبىلىم بەرۋ، دەنساۋلىق ساقتاۋ، مادەنيەت جانە سپورت سالالارىنداعى ۇكىمەتتىك ەمەس جانە مەملەكەتتىك ەمەس ۇيىمداردىڭ باسشى لاۋازىمدارىندا كەمىندە 5 جىل ءوتىلى بار قىزمەتكەرلەر تاعايىندالۋى مۇمكىن. بۇل تۇزەتۋلەر كەيبىر وڭىرلەردە بايقالاتىن بىلىكتى جانە مىقتى باسشىلارعا قاتىستى كادرلىق داعدارىستى شەشۋگە مۇمكىندىك بەرەدى. ءمام-گە ادامدارمەن جۇمىس ىستەۋدە مول تاجىريبەسى بار قوعامدىق بىرلەستىكتەردىڭ ماماندارىن تارتۋ كورسەتىلەتىن قىزمەتتەردىڭ ساپاسىنا دا وڭ اسەرىن تيگىزەدى.
«ءوزىن ءتيىمدى باسقارۋشى رەتىندە كورسەتكەن قوعامدىق ۇيىمداردىڭ كوشباسشىلارىن مەديتسينالىق-الەۋمەتتىك مەكەمەلەردى باسقارۋعا تارتۋ ءمام قىزمەتىنە بارىنشا اشىقتىقتى قامتاماسىز ەتۋگە جانە مازمۇندى تاسىلدەردى، تەحنولوگيالاردى، يننوۆاتسيالىق ادىستەردى ەنگىزۋگە كومەكتەسەدى»، – دەپ اتاپ ءوتتى قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ.
«ادىرنا» ۇلتتىق پورتالى
