ماحامبەت دوسمۇحامبەتوۆ وليمپيادا جەڭىمپازدارىن ماراپاتتادى

3099
Adyrna.kz Telegram

اتىراۋ وبلىسىنىڭ اكىمى ماحامبەت دوسمۇحامبەتوۆ حالىقارالىق ءبىلىم وليمپياداسىنىڭ جەڭىمپازدارىن قابىلدادى.

فيزيكا جانە ماتەماتيكا پاندەرىنەن حالىقارالىق دارەجەدەگى وليمپيادا بيىل شىلدە ايىنىڭ 14-25 كۇندەرى ءوتىپ، وعان قاتىسقان وبلىسىمىزدىڭ ء“بىلىم-يننوۆاتسيا” ليتسەي-ينتەرناتىنىڭ ەكى بىردەي شاكىرتى جەڭىمپاز اتانعان بولاتىن.

اتاپ ايتقاندا 1959 جىلدان بەرى وتكىزىلىپ كەلە جاتقان حالىقارالىق ماتەماتيكالىق وليمپياداسىن العاش رۋمىنيا مەملەكەتى ۇيىمداستىرسا، بيىلعى 62-ءشى حالىقارالىق ماتەماتيكالىق وليمپياداسىن رەسەي فەدەراتسياسى وتكىزگەن.

اتالعان وليمپياداعا ماتەماتيكا پانىنەن التى وقۋشى تاڭدالىپ الىنعان. سونىڭ ءبىرى-2019 جىلى وتكەن رەسپۋبليكالىق ءپان وليمپياداسىنىڭ ابسوليۋتتىك چەمپيونى اتىراۋ وبلىستىق «ءبىلىم-يننوۆاتسيا» ليتسەي-ينتەرناتىنىڭ 11-كلاسس وقۋشىسى ايبەك مىرزاتاي التىن مەدالدى جەڭىپ العان ەدى.

بۇل جەڭىس ماتەماتيكا ءپانى وليمپياداسىندا بۇرىن-سوڭدى رەسپۋبليكا تاريحىندا بولماعان.

ال، حالىقارالىق فيزيكا وليمپياداسى 1967 جىلدان بەرى وتكىزىلىپ كەلەدى، بيىل ليتۆا مەملەكەتىندە ۇيىمداستىرىلعان 51-ءشى حالىقارالىق فيزيكا IرhO-2021 وليمپياداسى قاشىقتىقتان فورماتىندا ءوتتى.

بۇل وليمپياداعا قازاقستاندىق ۇلتتىق قۇرامىنا فيزيكا پانىنەن حالىقارالىق، رەسپۋبليكالىق جارىستار مەن وليمپيادانىڭ جۇلدەگەرلەرىنەن بەس وقۋشى تاڭدالىپ الىندى. ولاردىڭ ءبىرى – اتالعان وقۋ ورنىنىڭ 10-سىنىپ وقۋشىسى ريزابەك الپامىس. ول وليمپيادانىڭ قورىتىندىسىمەن كۇمىس مەدالگە يە بولدى.

وبلىس اكىمى اتالعان جەڭىمپازدار مەن ۇستازدارىن جانە اتا-انالارىن جەتكەن جەتىستىكپەن قۇتتىقتادى.
«ولكەمىزدە تالانتتى دا دارىندى بالالاردى انىقتاپ، ولارعا قولداۋ كورسەتۋدە كەشەندى شارالار جۇزەگە اسىپ كەلەدى. وبلىسىمىزدا دارىندى بالالارعا ارنالعان 7 ءبىلىم بەرۋ ۇيىمى بار، سولاردىڭ ءبىرى دە بىرەگەيى -«ءبىلىم-يننوۆاتسيا» ليتسەي-ينتەرناتى. قازاقستان اتىن حالىقارالىق ءبىلىم دوداسىندا بيىك تۇعىرعا كوتەرگەن شاكىرتتەرىمىزدىڭ جەڭىسى قۇتتى بولسىن! وسى جەڭىسكە بارشاڭىزدىڭ ۇلەستەرىڭىز زور ەكەندىگىن ەرەكشە اتاپ وتكىم كەلەدى»،-دەگەن ءوڭىر باسشىسى وبلىستا ءبىلىم بەرۋ ساپاسىن ارتتىراتىن ءۇش جىلدىق جول كارتاسى جۇزەگە اسىرىلۋدا ەكەنىن اتاپ ءوتتى.
«جول كارتاسى اياسىنداعى بارلىق جۇمىستاردىڭ ناتيجەلى ىسكە اسۋىنا، كەلەشەكتەگى ءبىلىم دودالارىندا جوعارى دەڭگەي كورسەتۋگە وبلىس اكىمدىگى تاراپىنان ءاردايىم قولداۋ بولاتىندىعىن ايتقىم كەلەدى»،-دەدى ول.

كەزدەسۋدە وبلىستىق «ءبىلىم-يننوۆاتسيا» ليتسەي-ينتەرناتىنىڭ ديرەكتورى ەلما يسمايل وقۋشىلار زاماناۋي جابدىقتالعان وقۋ ورنىندا جاڭا ءبىلىم بەرۋ ادىسىمەن وقىپ جاتقانىن ايتسا، اتا-انا نۇربەك جۇباتىروۆ ءبىلىمدى شاكىرت تاربيەلەگەن ۇستازدارعا العىسىن ءبىلدىردى.

جيىن سوڭىندا وبلىس اكىمى ماحامبەت دوسمۇحامبەتوۆ وليمپيادا جەڭىمپازدارى مەن ۇستازداردى جانە اتا-انالاردى العىس حاتتارمەن ماراپاتتاپ، سىيلىقتار تابىستادى.

پىكىرلەر