Karantınniń zııany qarapaıym halyqqa ǵana emes, Parlament depýtattaryna da kesirin tıgizip otyr. Eńbek demalysynda júrgen olar qansha qalasa da qazir toı-tomalaqqa bara almaı, demalystaryn otbasynyń janynda ótkizip júrgenderin aıtty, dep habarlaıdy “Adyrna” ulttyq portaly 31 arnaǵa silteme jasap.
Depýtat Berik Ábdiǵalıdyń demalysy qazaq tarıhyn zertteýmen ótip jatqan kórinedi. Úsh bólmeli qyzmettik páterinde úsh uly, jubaıy beseýi turady. Qoly qalt etse uldarynyń sportyna kóńil bóledi, aýlada serýendeıdi. Tipti arnaıy demalý úshin kýrort nemese sanatorııge de barmapty.
“Men de anda-sanda jattyǵamyn. 5-6 saǵat jumys isteımin. Qalǵan ýaqyt endi balalarmen dalaǵa shyǵamyz serýendep, otbasymyzben. Múmkinshilik bolsa tabıǵatqa shyǵamyz. Aýylǵa bardym otbasymmen. Ulytaýda, Torǵaıda boldym”,- deıdi depýtat.
Berik Ábdiǵalıdyń páterinde asa qymbat jıhaz ben múlik joq.
Páteriniń jataqhanaǵa uqsaıtynyn aıtqan depýtat Erlan Saırov kóbine úıde otyrmaıdy. Jaqynda otbasymen Chernogorııaǵa baryp, demalyp kelgen.
“Karantınniń kesirinen eshqandaı toı-tomalaq pen qonaqqa bara almaı, úıde otyryp qaldyq. Elge qaıtqyń keledi. Jaqsy bolsa da 2-3 kúnnen keıin aýylǵa qaıtqyń keledi ǵoı. Úıdemiz. Kitap oqımyz. Odan keıin keshke jaqyn júrý keminde 7-10 kılometr. Odan keıin sol kúzgi jumysqa daıyndyq qoı qazir”,- deıdi ol.
Al, atymda jalǵyz eski "Ýazıgim" bar degen aqjoldyq depýtat Berik Dúısenbınovtyń demalysy Qoıandyda, jylqy baǵýmen ótip jatyr.
Aqtóbede júrmin degen Dánııa Espaeva demalysyn nemere baǵýǵa arnapty. Nur Otandyq Bekbolat Tileýhannyń sportqa kóńil bólip júrgenin áleýmettik jelilerden kórýge bolady. Sondaı-aq, parlamentke bıyl depýtat bolyp saılanǵan Janarbek Áshimjan da basseınge, sanatorııge barǵanyn áleýmettik jelide ashyq jarııalap júr.
