اتىراۋدا استانا كۇنى مەرەكەسى قارساڭىندا الەۋمەتتىك سالا ماماندارىنا باسپانا كىلتى بەرىلىپ، بىرقاتار نىسان اشىلدى.
اتىراۋ وبلىسىنىڭ باسشىسى ماحامبەت دوسمۇحامبەتوۆ ءبىلىم، مادەنيەت جانە مەديتسينا سالاسىندا جۇمىس ىستەيتىن ءبىر توپ جاس مامانعا قىزمەتتىك باسپانا كىلتىن تابىس ەتتى.
«بيىل ەل بولىپ تاۋەلسىزدىگىمىزدىڭ 30 جىلدىعىن كەڭ اۋقىمدا اتاپ وتۋدەمىز. وسى كەزەڭدە مەملەكەتىمىز الەمدىك دەڭگەيدە كوپتەگەن سالادا ايتۋلى جەتىستىكتەرگە جەتتى. سونىڭ جارقىن كورىنىسىنىڭ ءبىرى – ارقا توسىندە بوي تۇزەگەن ارۋ استانامىز. ەلدىگىمىز بەن جاسامپاز ىستەرىمىزدىڭ سيمۆولىنا اينالعان اسەم شاھار - بۇگىندە حالقىمىزدىڭ ماقتانىشى»،-دەدى ايماق باسشىسى.
سونداي-اق ول جۋىردا حالىقارالىق تەاتر فەستيۆالدەرىندە تۇركيا مەن رەسەيدە ەكى بىردەي باس جۇلدەگە يە بولعان ماحامبەت اتىنداعى اكادەميالىق قازاق دراما تەاترى ونەرپازدارىن دا ماراپاتتادى.
سونىمەن قاتار، وبلىس باسشىسى اتىراۋ قالاسىندا جاڭادان سالىنعان كوللەدج جاتاقحاناسىنىڭ تۇساۋىن كەستى. 5 قاباتتى، 2 بلوكتان تۇراتىن، 150 ورىندىق جاتاقحانا زاماناۋي ۇلگىدە جاساقتالعان.
بۇدان سوڭ ءوڭىر باسشىسى كۇردەلى جوندەۋدەن وتكەن ورتالىق ءجۇزۋ باسسەينىنىڭ اشىلۋ سالتاناتىنا قاتىستى. «مۇندا ەندى مىڭعا جۋىق ءجاسوسپىرىم مەن تۇرعىن سۋ سپورتى تۇرلەرىمەن تەگىن شۇعىلدانادى. ءبىزدىڭ باستى ماقساتىمىز دا — ازاماتتارىمىزدىڭ سالاۋاتتى ءومىر سالتىن ۇستانۋعا جاعداي جاساۋ»،-دەدى وبلىس اكىمى.
ايتا كەتەرلىگى، مەملەكەتتىك تاپسىرىس نەگىزىندە 600-دەن استام بالا حالىقارالىق ستاندارتقا ساي ءجۇزۋ باسسەينىندە ءتۇرلى سەكتسيالارعا قاتىسادى. كوپ بالالى، تولىق ەمەس وتباسى بالالارىنا دا جەڭىلدىكتەر قاراستىرىلعان.
