راسۋل جۇمالى: ءبىزدىڭ بيلىك نە سەبەپتى كۇماندى رەسەيلىك ونىمگە بايلانىپ قالدى؟

1901
Adyrna.kz Telegram

ءوز باسىم اۋەلدەن Covid-19-دىڭ الدىن الۋشى كەز كەلگەن شارانىڭ جاقتاسىمىن. دەسە دە، قاتەرلى دەرتكە قارسى ءتۇرلى ۆاكتسينالار شىققاندا رەسەيلىك «Sputnik V»-نى ءتيىستى لابوراتوريالىق تاجىريبەدەن، سەرتيفيكاتسيادان، باسقا دا قاجەتتى سىناقتان وتپەگەنى ءۇشىن بىردەن-ءبىر سىناعان مەن بولدىم. العا تارتقان دايەگىم ءبىر - قازاقستان سالىق تولەۋشىلەرى، ياعني ءسىز بەن بىزدە الەمدىك ۇسىنىمدا بار تۇگەل ۆاكتسينالار اراسىندا تاڭداۋ بولسىن.

وكىنىشكە قاراي، ءبىزدىڭ ۇكىمەت تەك كۇماندى رەسەيلىك ۆاكتسيناعا قادالدى دا قالدى. بۇنىڭ ءماجبۇرلى قۇربانىنا مەن دە اينالدىم. وزگە بالاما بولماعان سوڭ الگى سپۋتنيكتى بۇكىل وتباسىممەن بارىپ قابىلدادىق. پايداسى بولعان دا شىعار، بىراق ەگىلگەنگە ءبىر اي وتپەي ءوزىم كوۆيدكە شالدىقتىم. ءويتىپ-ءبۇيتىپ ودان دا وتتىك. كۇنى-ءتۇنى جانىمنان شىقپاي بارىن جاساعان جۇبايىما راحمەت. ماسەلە مىنادا عوي. جوعارىدا ايتقانىمداي ءاۋ باستان ۇكىمەت نەلىكتەن الگى سپۋتنيككە عانا باسىمدىق بەردى؟ قورشاعان الەم تۇتاستاي رەسەيلىك دارىدەن باس تارتقانىن نەلىكتەن ەلەمەدى؟ باسقا ەلدەر الدەقايدا مىقتى دارۋمەندى الدەقايدا تومەن باعامەن، ءتىپتى تەگىن ۇسىنعاندا ءبىزدىڭ بيلىك نە سەبەپتى كۇماندى رەسەيلىك ونىمگە بايلانىپ قالدى؟ وسىنداي جاۋاپسىز سۇراق كوپ. تەك دەنساۋلىق ساقتاۋ سالاسىنا عانا بايلانىستى ەمەس. ايتالىق، اتىشۋلى كەدەندىك وداق اياسىندا قازاق بالاسى نەلىكتەن جاپوننىڭ، نەمىستىڭ، كارىستىڭ ساپالى كولىگىنىڭ ورنىنا رەسەيدىڭ «Lada» سىندى تەمىر-تەرسەگىن ساتىپ الۋعا ءماجبۇر؟ ءيا بولماسا جارتى قازاقستاندى ۋلاپ جاتقان رەسەي قاراماعىنداعى بايقوڭىردى نەگە ءوزىمىز باسقارۋعا الىپ. وسىندا تابيعاتقا وڭ كوزبەن قارايتىن حالىقارالىق جوبا قۇرمايمىز؟ وسىنداي نەگەلەر جەتىپ ارتىلادى. ال ەندى ماسەلەنىڭ شەشىمىن بيلىكتە " ورىس الەمىنىڭ" مىقتى ءلوببيى قادالاعاندا قازاق ۇتىلا بەرەتىنى ءسوزسىز. وكىنىشتىسى - ءبىر-بىرىمەن جاعا جىرتىسقان قازاقتىڭ بۇنىمەن شارۋاسى دا ۋاقىتى جوق. ولاي بولسا نەسىنە جىلاي بەرەمىز؟ ەنشىمىز وسى..

پىكىرلەر