ءدال بىزدەگى جاعداي! ار-نامىستى ءولتىرۋدىڭ "اعىلشىندىق" ءتاسىلى

3583
ءۇندىستان ۇلىبريتانيا كورولدىگىنىڭ وتارى بولىپ تۇرعان كەزدە ءبىر اعىلشىن وفيتسەرى بازاردا سۋسىن ساتىپ جۇرگەن ءبىر ۇندىمەن كەرىسىپ قالىپ، ءبىر-بىرىنە قول كوتەرۋگە دەيىن بارىپتى. اشۋدان تۇتىگىپ بولىمشەسىنە جەتىپ كومانديرىنە "جەرىن باسىپ الىپ، وزدەرىن باعىندىرساق تا قالايشا بىزگە قارسى شىعۋعا داتتەرى بارادى؟" دەپ شاعىمدانعان عوي.
باستىعى تىڭداپ بولىپ وعان: "قازىر بازارعا قايتىپ بار دا ونى تاۋىپ الىپ، سەن باتىل، ەرجۇرەك ەكەنسىڭ دەپ ارقاسىنان قاعىپ، ماقتا دا، ساۋداسىن ۇلعايتۋ ءۇشىن ءبىراز اقشا بەر" دەيدى.
ءبىرشاما ۋاقىتتان سوڭ كومانديرى وفيتسەردى شاقىرىپ: ،،وتكەندە مەن ايتقانداي ىستەدىڭ با" دەپتى. ،،ءيا، ىستەدىم". ،،وندا بار دا، ونى مىقتاپ تۇرىپ سابا".
وفيتسەر بازارعا كەلسە، الگى ادام تاعى 4-5 جەردەن ساۋدا نۇكتەلەرىن اشىپ تاستاعان، جۇمىسىن جۇرگىزەتىن ادامدار جالداعان، ساۋداسى شالقىپ ءجۇرىپ جاتىر ەكەن. وفيتسەردى كورىپ، جۇگىرىپ قاسىنا جەتكەندە، بۇل ءسوز ايتپاستان جاقتان تارتقان عوي. اناۋ ءۇن قاتپاپتى. تاعى ءبىر-ەكى شاپالاق جىبەرسە، باسى سالبىراپ سول كۇيى تۇر دەيدى ۇندەمەستەن. قاتتى تاڭ بولعان وفيتسەر كومانديرىنە كەلمەي مە، نەگە بۇنداي بولىپ قالدى دەپ. سوندا كومانديرى:
,،سەن ءبىرىنشى رەت ۇرعاندا وندا ءوزىنىڭ ار-نامىسىنان باسقا ەشتەڭە جوق ەدى، ول سول وزىندە بار ارىن، نامىسىن قورعادى. ال قازىر ول بايىدى، دۇنيە-مۇلكى بار، ساعان قارسىلاسۋعا سول دۇنيەسىنەن ايىرىلىپ قالامىن دەپ قورىقتى. قىسقاسى ار-نامىستى دۇنيەگە ايىرباستاپ جىبەردى" دەگەن ەكەن.
قازىر ارامىزدا، كوز الدىمىزدا قانشا كەۋدەسىندە ايتەۋىر جانى بار، باسقاسىنىڭ ءبارىن جوعالتقان پەندەلەر ءجۇر. ارىن، نامىسىن، ءتىپتى ۇلتىنىڭ مۇددەسىن اقشاعا، كرەسلوعا ايىرباستاپ جىبەرگەن.
اسىرەسە ءوز، قاراكوز جۇمىسشىمىزدىڭ شاعىمدارىنا پىسقىرماي، شەتەل ينۆەستورلارىنىڭ الدىندا قۇرداي جورعالايتىن باسشىلاردى كورگەندە، انالاردىڭ قولىن قايىرىپ، سۇيرەپ بارا جاتقان كۇشتىك قۇرىلىم قىزمەتكەرلەرىن كورگەندە، الگى ۇندىلىكتىڭ بەينەسى ەرىكسىز كوز الدىڭا كەلەدى ەكەن.
رامازان اجنيازوۆتىڭ
فەيسبۋك پاراقشاسىنان
پىكىرلەر
ۇقساس جاڭالىقتار