21 جەلتوقسان الماتىداعى قر ۇلتتىق عىلىم اكادەمياسىنىڭ كىتاپحاناسىندا قوعام قايراتكەرى، «كيەلى قازاقستان» ورتالىعىنىڭ جەتەكشىسى بەرىك ابدىعاليۇلىنىڭ «ۆويسكو الاش» اتتى كىتابىنىڭ تۇساۋ كەسەرى بولىپ، تۇساۋ كەسەردىڭ سوڭى «الاش وردا ۇكىمەتى مەن الاش اۆتونومياسىنىڭ 100 جىلدىعىنىڭ قۇرمەتىنە ەستەلىك» مەدالىمەن ماراپاتتاۋمەن اياقتالدى.
تۇساۋى كەسىلگەن كىتابىن تانىستىرىپ، الاش اسكەرى تۋرالى زەرتتەۋلەرىمەن بولىسكەن بەرىك ابدىعالي: «ءبىزدىڭ باستى ماقسات الاش اسكەرىندە كىمدەر بولعانىن انىقتاپ، ءتىزىمىن ىزدەۋ بولدى. كىتاپتا 750-گە جۋىق ساربازدىڭ ءتىزىمى جاسالدى. مۇندا اياگوز، ءۇرجار، ماقانشى، ءۇشارال، اقسۋ، سارقانت، قاپال جۇزدىكتەرىنىڭ ءتىزىمى تولىعىمەن كىرگەن. ساربازداردىڭ اتا-بابالارىنىڭ اتى-جونىمەن بار. ول كىسىلەر مۇلدە ۇمىتىلىپ كەتكەن. بۇل كۇندە ۇرپاقتارى دا بىلمەيدى» دەپ الاش اسكەرى تۋرالى زەرتتەۋدىڭ ءالى جالعاساتىندىعىن، ەندى الاش اسكەرى قۇرامىندا بولعان ساربازداردىڭ ۇرپاقتارىن تاۋىپ، اتا-باباسىنىڭ كىم بولعانىنىڭ تاريحي باعاسىن بەرىپ، ناسيحاتتاۋدى ماقسات ەتكەندەرىن ايتىپ ءوتتى.
كىتاپتىڭ تۇساۋ كەسەرىنەن كەيىن تاريح عىلىمدارىنىڭ دوكتورى، قر ۇعا اكادەميگى مامبەت قويگەلدى مەن بەرىك ابدىعالي الاش وردا ۇكىمەتىنىڭ 100 جىلدىعىنىڭ ءوز دەڭگەيىندە وتۋگە اتسالىسقان ازاماتتار مەن ۇزاق جىلداردان بەرى الاش وردانى زەرتتەۋگە ۇلەس قوسقان عالىمدار مەن الاش پەن الاش يدەياسىن دارىپتەۋشىلەرگە قر ۇلتتىق عىلىم اكادەمياسىنىڭ «الاش وردا ۇكىمەتى مەن الاش اۆتونومياسىنىڭ 100 جىلدىعىنىڭ قۇرمەتىنە ەستەلىك» مەدالىن تابىس ەتتى.
اتالعان مەدال الاشتانۋشى مامبەت قويگەلدى مەن بەرىك ابدىعاليدىڭ وزدەرىنەن باستاپ، تاريح عىلىمدارىنىڭ دوكتورى، عالىم ءنابيجان مۇحامەتقانۇلىنا، بەلگىلى جۋرناليستەر مەن ساياساتتانۋشىلار ەرمۇرات باپي، ءامىرجان قوسانوۆ، بولات ءمۇرسالىم، ايدوس سارىم، داۋرەن قۋات باستاعان ءبىر توپ ازاماتتار مەن ۇعا قىزمەتكەرلەرىنە، الماتى قالاسى مادەنيەت جانە ارحيۆتەر باسقارماسىنىڭ قىزمەتكەرلەرىنە، تاعى دا باسقا ازاماتتارعا بەرلىدى.
الاش وردانى زەرتتەۋ مەن دارىپتەۋ الاش وردانىڭ 100 جىلدىعىنان كەيىن دە جالعاسا بەرمەك. الاش اسكەرى، الاش وردا تۋرالى زەتتەۋ ناتيجەلەرى ءالى تالاي كىتاپ بولىپ شىعىپ، الاش وردانى زەرتتەگەن، دارىپتەگەن الاششىل ازاماتتاردىڭ كەۋدەسىنە ءالى تالاي مەدالدەر تاعىلا بەرسىن دەپ تىلەيمىز.
Abai.kz
