Alash áskeri týraly kitaptyń tusaýkeserinde Alash Orda zertteýshileri marapattaldy

2744
Adyrna.kz Telegram

21 Jeltoqsan Almatydaǵy QR Ulttyq ǵylym akademııasynyń kitaphanasynda qoǵam qaıratkeri, «Kıeli Qazaqstan» ortalyǵynyń jetekshisi Berik Ábdiǵalıulynyń «Voısko Alash» atty kitabiniń tusaý keseri bolyp, tusaý keserdiń sońy «Alash Orda úkimeti men Alash avtonomııasynyń 100 jyldyǵynyń qurmetine estelik» medalimen  marapattaýmen aıaqtaldy.

Tusaýy kesilgen kitabyn tanystyryp, Alash Áskeri týraly zertteýlerimen bólisken Berik Ábdiǵalı: «Bizdiń basty maqsat Alash áskerinde kimder bolǵanyn anyqtap, tizimin izdeý boldy. Kitapta 750-ge jýyq sarbazdyń tizimi jasaldy. Munda Aıagóz, Úrjar, Maqanshy, Úsharal, Aqsý, Sarqant, Qapal júzdikteriniń tizimi tolyǵymen kirgen. Sarbazdardyń ata-babalarynyń aty-jónimen bar. Ol kisiler múlde umytylyp ketken. Bul kúnde urpaqtary da bilmeıdi» dep Alash áskeri týraly zertteýdiń áli jalǵasatyndyǵyn, endi Alash áskeri quramynda bolǵan sarbazdardyń urpaqtaryn taýyp, ata-babasynyń kim bolǵanynyń tarıhı baǵasyn berip, nasıhattaýdy maqsat etkenderin aıtyp ótti.

Kitaptyń tusaý keserinen keıin tarıh ǵylymdarynyń doktory, QR UǴA akademıgi Mámbet Qoıgeldi men Berik Ábdiǵalı Alash Orda úkimetiniń 100 jyldyǵynyń óz deńgeıinde ótýge atsalysqan azamattar men uzaq jyldardan beri Alash Ordany zertteýge úles qosqan ǵalymdar men Alash pen Alash ıdeıasyn dáripteýshilerge QR Ulttyq ǵylym akademııasynyń «Alash Orda úkimeti men Alash avtonomııasynyń 100 jyldyǵynyń qurmetine estelik» medalin tabys etti.

Atalǵan medal Alashtanýshy Mámbet Qoıgeldi men Berik Ábdiǵalıdyń ózderinen bastap, tarıh ǵylymdarynyń doktory, ǵalym Nábıjan Muhametqanulyna, belgili jýrnalıster men saıasattanýshylar Ermurat Bapı, Ámirjan Qosanov, Bolat Múrsálim, Aıdos Sarym, Dáýren Qýat bastaǵan bir top azamattar men UǴA qyzmetkerlerine, Almaty qalasy Mádenıet jáne arhıvter basqarmasynyń qyzmetkerlerine, taǵy da basqa azamattarǵa berlidi.

Alash Ordany zertteý men dáripteý Alash Ordanyń 100 jyldyǵynan  keıin de jalǵasa bermek. Alash áskeri, Alash Orda týraly zetteý nátıjeleri áli talaı kitap bolyp shyǵyp, Alash Ordany zerttegen, dáriptegen alashshyl azamattardyń keýdesine áli talaı medalder taǵyla bersin dep tileımiz.


Abai.kz

Pikirler