قازاقستان شاحماتشىسى اقش گروسسمەيستەرىن جەڭىپ سەنساتسيا جاسادى

2956
Adyrna.kz Telegram

شاحماتتان قازاقستان قۇراماسىنىڭ كوشباسشىسى، حالىقارالىق گروسسمەيستەر رينات جۇماباەۆ الەم ۆيتسە-چەمپيونى، اقش گروسسمەيستەرى فابيانو كارۋانانى جەڭىپ، سەنساتسيا جاسادى، - دەپ حابارلايدى “ادىرنا” ۇلتتىق پورتالى قازاقستان شاحمات فەدەراتسياسىنا سىلتەمە جاساپ.

ول سوچيدە ءوتىپ جاتقان 2021 جىلعى فيدە الەم كۋبوگىندا جەڭىسكە جەتتى.

"بۇگىنگى تۋرداعى جەڭىس قۇرامانىڭ كوشباسشىسىنا وڭاي بولعان جوق، سەبەبى ول قارا تۇستە وينادى. الايدا تاباندى كۇرەس بارىسىندا ستاندارتتى ەمەس قاتىناسى بار پوزيتسيا پايدا بولدى جانە رينات قارسىلاسىن جەڭە الدى. كەشەگى تۋردا قازاقستاندىق گروسسمەيستەر تەڭ وينادى، وسىلايشا 1.5:0.5 ەسەبىمەن رينات فيدە الەم كۋبوگىنىڭ كەلەسى كەزەڭىنە وتكەن ەدى", - دەدى قازاقستان شاحمات فەدەراتسياسىنداعىلار.

فەدەراتسيا مالىمەتى بويىنشا، 2018 جىلى كارۋانا ۇمىتكەرلەر ءتۋرنيرىنىڭ جەڭىمپازى اتانىپ، قازىرگى چەمپيون ماگنۋس كارلسەنمەن الەم چەمپيونى اتاعى ءۇشىن وينادى.

ريناتتىڭ كەلەسى قارسىلاسى بۇگىن اقش-تان كەلگەن گروسسمەيستەر سەم شەنكلەند پەن ۋكراينادان كەلگەن الەكساندر ارەششەنكو اراسىنداعى ماتچتە تاي-برەيك قورىتىندىسى بويىنشا انىقتالادى.

پىكىرلەر