قازاقستاننىڭ تۇڭعىش پرەزيدەنتى نۇرسۇلتان نازارباەۆ قازاقستاندىقتاردى قۇربان ايت مەرەكەسىمەن قۇتتىقتادى، - دەپ حابارلايدى elbasy.kz.
"قۇرمەتتى وتانداستار! بارشاڭىزدى قاسيەتتى قۇربان ايت مەيرامىمەن شىن جۇرەكتەن قۇتتىقتايمىن! قۇربان ايت - ادامداردى بەيبىتشىلىك پەن بىرلىككە، مەيىرىمدىلىك پەن ىزگىلىككە ۇندەيتىن جارقىن مەرەكە. قازاقستاندىقتار ءۇشىن بۇل مەيرامنىڭ ماڭىزى ەرەكشە. ول ادامگەرشىلىك جانە رۋحاني قۇندىلىقتاردى ناسيحاتتاپ، ءتۇرلى ۇلت پەن ءدىن وكىلدەرى اراسىنداعى اۋىزبىرلىك پەن سىيلاستىقتى ارتتىرۋعا سەپتىگىن تيگىزەدى.
ايت كۇندەرى ءاربىر ادام يگى ىستەر جاساپ، رۋحاني تازارۋعا، قۇربان شالىپ، كومەككە مۇقتاج جاندارعا قول ۇشىن سوزۋعا تىرىسادى. قازىرگى ۋاقىتتا قۇربان ايت مەيرامى جاقسىلىقتىڭ جارشىسىنا اينالىپ، ەلىمىزدە تاتۋلىق پەن كەلىسىمدى نىعايتۋعا ۇيتقى بولىپ وتىر. الداعى ۋاقىتتا دا سولاي بولارىنا كامىل سەنەمىن. وسىناۋ قاستەرلى مەرەكەدە ءاربىر شاڭىراققا شاتتىق، تىنىشتىق پەن باق-بەرەكە تىلەيمىن! ايت قابىل بولسىن!" - دەدى نازارباەۆ.
