اقش-تا اتۋ، قاساقانا زيان كەلتىرۋ دەرەكتەرى كوبەيگەن. سونىڭ سالدارىنان نيۋ-يورك گۋبەرناتورى وتكەن اپتادا توتەنشە جاعداي جاريالاعان دەپ حابارلايدى "ادىرنا" ۇلتتىق پورتالى "24.kz-كە" سىلتەمە جاساپ.
بيىل جىل باسىنان بەرى اقش-تا 24 مىڭنان استام اتىس وقيعاسى تىركەلىپتى. قىلمىستىڭ بۇل ءتۇرى كۇننەن-كۇنگە ءورشىپ بارادى.
وسى اپتادا نيۋ-يوركتىڭ برونكس اۋدانىندا تاعى ءبىر جانتۇرشىگەرلىك وقيعا بولدى. بەلگىسىز بىرەۋلەر تۇسكى ساعات ۇشتەردىڭ شاماسىندا 13 جاسار جاسوسپىرىمگە تاپانشادان وق اتىپ، بىرنەشە جەرىنەن جاراقاتتاعان. جەرگىلىكتى قىلمىستىق توپتىڭ قۇربانىنا اينالعان قىرشىنداي جاس اۋرۋحاناعا جەتپەستەن قايتىس بولعان.
جەرگىلىكتى پوليتسيا باسقارماسىنىڭ مالىمەتىنشە، جىل باسىنان بەرى بۇل قالادا 803 اتىس وقيعاسى تىركەلىپ، سالدارىنان 931 ادام زارداپ شەكتى. اتىس قارۋىمەن جاسالاتىن قىلمىستىڭ كۇرت وسۋىنە بايلانىستى نيۋ-يورك گۋبەرناتورى ەندريۋ كۋومو شتات اۋماعىندا توتەنشە جاعداي جاريالادى.
– ءبىز كوۆيد ەپيدەمياسىن جەڭگەندەي بولىپ ەدىك، ەندى مىنە تاعى ءبىر ەپيدەمياعا تاپ بولىپ وتىرمىز. ول قارۋ-جاراقپەن جاسالىپ جاتقان قىلمىس ەپيدەمياسى. سالدارىنان حالىق جۇمىسقا بارۋعا جانە كوشەگە شىعۋعا قورقىپ وتىر. بۇل ماسەلەنى بىرىگىپ شەشۋىمىز كەرەك، — دەيدى نيۋ-يورك شتاتىنىڭ گۋبەرناتورى ەندريۋ كۋومو.
شتات باسشىسى اتالعان پروبلەمانى شەشۋ جولىنا 139 ملن دوللار بولىنەتىنىن مالىمدەدى. سونىمەن قاتار قوسىمشا 21 مىڭ جاڭا جۇمىس كۇشى تارتىلاتىنى بەلگىلى بولدى. الايدا ماسەلەنىڭ توركىنى قارجىلاندىرۋ مەن جۇمىس كۇشىنىڭ جەتىسپەۋشىلىگىندە ەمەس، جۇيەلى رەفورمالاردىڭ جۇرگىزىلمەۋىندە دەيدى تاۋەلسىز ساراپشىلار.
رەسمي دەرەك بويىنشا، جىل سايىن قارۋدان 40 مىڭعا جۋىق امەريكالىق قايتىس بولادى. اراسىندا كامەلەتكە تولماعاندار دا بار. اسىرەسە لاتىن جانە قارا ناسىلدىلەر تۇراتىن اۋدانداعى بالالاردىڭ اتىس قۇربانى بولۋى اق امەريكالىقتارمەن سالىستىرعاندا 10 ەسە جوعارى ەكەن. بۇل ءبىر عانا گۋبەرناتوردىڭ ەمەس، تۇتاس كونگرەستىڭ الاڭدايتىن ماسەلەسى بولىپ وتىر.
"ادىرنا" ۇلتتىق پورتالى.
