قازاقستاندىقتار جالپى مولشەرى 22,3 ملرد تەڭگە بولاتىن مەملەكەتتىك جيناقتاۋ جۇيەسى بويىنشا 16 مىڭنان استام ءبىلىم بەرۋ دەپوزيتىن اشقان دەپ حابارلايدى "ادىرنا" ۇلتتىق پورتالى.
قر ءبىلىم جانە عىلىم مينيسترلىگى مالىمدەگەندەي، ەلىمىزدە بۇعان دەيىن كوپتەگەن ازاماتتار وزدەرىنىڭ نەمەسە بالالارىنىڭ ءبىلىم الۋىنا اقشالاي قاراجات جيناقتاۋ ءۇشىن «AQYL» ءبىلىم بەرۋ جيناقتاۋ سالىمدارىنا قارجى جيناعان.
اتالعان جيناقتاۋشى سالىم جۇيەسىن قولداۋدىڭ باستى ارتىقشىلىعى — 9%-عا دەيىنگى بانكتىك سىياقىدان باسقا، قازاقستاندىقتاردىڭ سالىمدارىنا مەملەكەتتىك سىيلىقاقى ەسەپتەلەدى. بۇل ارتىقشىلىق حالىقتىڭ الەۋمەتتىك وسال توپتارى ءۇشىن دە قاراستىرىلعان.
«مەملەكەت سىيلىقاقىنىڭ جىلدىق مولشەرى 5%-دى، حالىقتىڭ الەۋمەتتىك وسال توپتارى ءۇشىن جيناقتالعان سومانىڭ 7%-ىن قۇرايدى. بۇل رەتتە بانكتىك سىياقى مەن مەملەكەتتىڭ سىيلىقاقىسى كاپيتالداندىرىلادى، ياعني نەگىزگى سالىمعا قوسىلادى. «AQYL» ءبىلىم بەرۋ جيناقتاۋ سالىمدارى دەپوزيتتىك نارىقتا ەڭ جوعارى كىرىسكە يە ەكەنىن ايتا كەتكەن ءجون. وسىلايشا، مەملەكەت اتا-انالارعا بالانى وقىتۋعا كەتەتىن شىعىنداردى جانە وتباسىلىق بيۋدجەتكە تۇسەتىن جۇكتەمەنى ەداۋىر ازايتۋعا كومەكتەسەدى»، – دەپ حابارلادى قر بعم.
بۇدان باسقا، ءبىلىم بەرۋ دەپوزيتى قازاقستاننىڭ دەپوزيتتەرگە كەپىلدىك بەرۋ قورىمەن ساقتاندىرىلعان جانە مەملەكەت پەن ءۇشىنشى تۇلعالار تاراپىنان دا كەز كەلگەن شەكتەۋلەر مەن ءوندىرىپ الۋلاردان قورعالعان. بۇل مەملەكەتتىك ءبىلىم بەرۋ جيناقتاۋ جۇيەسى شەڭبەرىندە اشىلعان دەپوزيتكە تىيىم سالا المايتىندىعىن بىلدىرەدى.
«دەپوزيتتى مەملەكەتتىك ءبىلىم بەرۋ جيناقتاۋ جۇيەسىنىڭ سەرىكتەس بانكتەرىندە اشۋعا بولادى. سالىمشى وتباسىلىق بيۋدجەتتىڭ مۇمكىندىكتەرى مەن جۇكتەمەسىنە بايلانىستى سالىمدى تولىقتىرۋدىڭ مولشەرى مەن جۇيەلىلىگىن ءوزى انىقتايدى. ءبىلىم بەرۋ دەپوزيتىن كاسسالار، ينتەرنەت-بانكينگ، سونداي-اق كارتادان جيناقتاۋشى شوتقا اۋدارۋ ارقىلى تولىقتىرۋعا بولادى. بۇل سالىمشىلاردىڭ ۋاقىتىن ايتارلىقتاي ۇنەمدەيدى»، – دەپ ناقتىلادى مينيسترلىكتەگىلەر.
وسىلايشا تۇلەكتەر گرانتقا تۇسكەن جاعدايدا سالىمشى بارلىق قاراجاتتى بانك سىياقىسىمەن جانە مەملەكەت سىيلىقاقىسىمەن بىرگە شوتتان الۋعا قۇقىلى. سونداي-اق ول قاراجاتتى ءۇشىنشى تۇلعانىڭ ءبىلىم بەرۋ سالىمىنا اۋدارا الادى نەمەسە ماگيستراتۋرا بويىنشا وقۋىن تولەۋ ءۇشىن جيناۋدى جالعاستىرۋىنا بولادى. مەملەكەتتىك ءبىلىم بەرۋ جيناقتاۋ جۇيەسى اياسىندا وقىتۋ گەوگرافياسىنا بايلانىستى شەكتەۋلەر جوق. ياعني، جيناقتاردى قازاقستاندىق كوللەدجدەر مەن جوعارى وقۋ ورىندارىندا، سونداي-اق شەتەلدە وقۋ اقىسىن تولەۋ ءۇشىن دە پايدالانۋعا بولادى.
تەحنيكالىق، جوعارى جانە جوعارى وقۋ ورنىنان كەيىنگى ءبىلىم الۋعا «AQYL» ءبىلىم بەرۋ دەپوزيتىن جاسىنا قاراماستان بارلىق قازاقستاندىق اشا الادى.
"ادىرنا" ۇلتتىق پورتالى.
