Qazaqstandyqtar jalpy mólsheri 22,3 mlrd teńge bolatyn memlekettik jınaqtaý júıesi boıynsha 16 myńnan astam bilim berý depozıtin ashqan dep habarlaıdy "Adyrna" ulttyq portaly.
QR Bilim jáne ǵylym mınıstrligi málimdegendeı, elimizde buǵan deıin kóptegen azamattar ózderiniń nemese balalarynyń bilim alýyna aqshalaı qarajat jınaqtaý úshin «AQYL» bilim berý jınaqtaý salymdaryna qarjy jınaǵan.
Atalǵan jınaqtaýshy salym júıesin qoldaýdyń basty artyqshylyǵy — 9%-ǵa deıingi banktik syıaqydan basqa, qazaqstandyqtardyń salymdaryna memlekettik syılyqaqy esepteledi. Bul artyqshylyq halyqtyń áleýmettik osal toptary úshin de qarastyrylǵan.
«Memleket syılyqaqynyń jyldyq mólsheri 5%-dy, halyqtyń áleýmettik osal toptary úshin jınaqtalǵan somanyń 7%-yn quraıdy. Bul rette banktik syıaqy men memlekettiń syılyqaqysy kapıtaldandyrylady, ıaǵnı negizgi salymǵa qosylady. «AQYL» bilim berý jınaqtaý salymdary depozıttik naryqta eń joǵary kiriske ıe ekenin aıta ketken jón. Osylaısha, memleket ata-analarǵa balany oqytýǵa ketetin shyǵyndardy jáne otbasylyq bıýdjetke túsetin júktemeni edáýir azaıtýǵa kómektesedi», – dep habarlady QR BǴM.
Budan basqa, bilim berý depozıti Qazaqstannyń depozıtterge kepildik berý qorymen saqtandyrylǵan jáne memleket pen úshinshi tulǵalar tarapynan da kez kelgen shekteýler men óndirip alýlardan qorǵalǵan. Bul memlekettik bilim berý jınaqtaý júıesi sheńberinde ashylǵan depozıtke tyıym sala almaıtyndyǵyn bildiredi.
«Depozıtti memlekettik bilim berý jınaqtaý júıesiniń seriktes bankterinde ashýǵa bolady. Salymshy otbasylyq bıýdjettiń múmkindikteri men júktemesine baılanysty salymdy tolyqtyrýdyń mólsheri men júıeliligin ózi anyqtaıdy. Bilim berý depozıtin kassalar, ınternet-bankıng, sondaı-aq kartadan jınaqtaýshy shotqa aýdarý arqyly tolyqtyrýǵa bolady. Bul salymshylardyń ýaqytyn aıtarlyqtaı únemdeıdi», – dep naqtylady mınıstrliktegiler.
Osylaısha túlekter grantqa túsken jaǵdaıda salymshy barlyq qarajatty bank syıaqysymen jáne memleket syılyqaqysymen birge shottan alýǵa quqyly. Sondaı-aq ol qarajatty úshinshi tulǵanyń bilim berý salymyna aýdara alady nemese magıstratýra boıynsha oqýyn tóleý úshin jınaýdy jalǵastyrýyna bolady. Memlekettik bilim berý jınaqtaý júıesi aıasynda oqytý geografııasyna baılanysty shekteýler joq. Iaǵnı, jınaqtardy qazaqstandyq kolledjder men joǵary oqý oryndarynda, sondaı-aq shetelde oqý aqysyn tóleý úshin de paıdalanýǵa bolady.
Tehnıkalyq, joǵary jáne joǵary oqý ornynan keıingi bilim alýǵa «AQYL» bilim berý depozıtin jasyna qaramastan barlyq qazaqstandyq asha alady.
"Adyrna" ulttyq portaly.
