ۆاكتسينا العان ەر ادام وتىرىك قۇلاپ قالعان

2248
Adyrna.kz Telegram

اتىراۋدا 22 جاستاعى ەر ادام ۆاكتسينا سالدىرعاننان كەيىن جاعدايى ناشارلاپ كەتكەندەي كەيىپ تانىتقان، دەپ حابارلايدى «ادىرنا» ۇلتتىق پورتالى turkystan.kz سايتىنا سىلتەمە جاساپ.

14 شىلدەدە الەۋمەتتىك جەلىلەردە ۆاكتسينا سالدىرعاننان كەيىن جاعدايى ناشارلاپ كەتكەن ەر ادامعا تۇرعىنداردىڭ كومەكتەسىپ جاتقانى تۋرالى ۆيدەو تاراعان بولاتىن. ۆيدەودا اتىراۋداعى «دينا» بازارىنىڭ جانىندا ەر ادامنىڭ جاعدايى ناشارلاي باستاعانى كورسەتىلگەن.

«دينا» بازارىنداعى ەكپە پۋنكتىنىڭ مەديتسينا قىزمەتكەرلەرىنىڭ سوزىنشە، 14 شىلدەدە ساعات 15.00-دە وزبەكستاننىڭ 22 جاستاعى ازاماتى «سپۋتنيك V» ۆاكتسيناسىنىڭ ەكىنشى دوزاسىن سالدىرعان.

«وعان دەيىن كەزەكتە تۇرعانىندا ول مەديتسينا قىزمەتكەرلەرىنە دورەكى سويلەپ، ۆاكتسينانىڭ كەرى اسەرى تۋرالى ۆيدەو تۇسىرەتىنىن ايتىپ قورقىتقان. ەر ادام ەكپە سالدىرعاننان كەيىن 30 مينۋت باقىلاۋدا بولدى، سوسىن ۇيىنە جىبەرىلدى»، – دەيدى وبلىستىق دەنساۋلىق ساقتاۋ باسقارماسىنىڭ وكىلدەرى.

ال 18.30-دا «دينا» بازارىنان جەدەل جاردەمگە ەر ادامنىڭ جاعدايى ناشارلاپ، ءسىڭىرى تارتىلا باستاعانى تۋرالى قوڭىراۋ تۇسكەن.

«جەدەل جاردەم ءۇش ساعات بۇرىن ۆاكتسينا سالدىرعان وزبەكستان ازاماتىنا شاقىرىلعان. ول اۋرۋحانانىڭ قابىلداۋ بولمەسىنە جەتكىزىلىپ، 30 مينۋتتان كەيىن ۇيىنە جىبەرىلدى. سەبەبى دەنساۋلىعى قالىپتى، اۋرۋحاناعا جاتقىزاتىنداي اۋرۋ بەلگىلەرى بولمادى»، – دەيدى مەديتسينا قىزمەتكەرلەرى.

وسىعان بايلانىستى دەنساۋلىق ساقتاۋ باسقارماسى اتىراۋلىقتاردان ارانداتۋلارعا ءمان بەرمەۋدى جانە تەك رەسمي اقپارات كوزدەرىنە سەنۋدى سۇرادى.

"ادىرنا" ۇلتتىق پورتالى

پىكىرلەر