قازاقستاندا ادام ساۋداسىنا بايلانىستى قىلمىستىق قۇقىق بۇزۋشىلىق سانى ءبىر جىلدا بىردەن ەكى ەسەگە كوبەيدى، - دەپ حابارلايدى “ادىرنا” ۇلتتىق پورتالى Ranking.kz پورتالىنا سىلتەمە جاساپ.
2021 جىلعى قاڭتار-مامىردا ەلدە ادام ساۋداسىنا بايلانىستى 63 قۇقىق بۇزۋشىلىق تىركەلگەن. بۇل ءبىر جىل بۇرىنعى كورسەتكىشتەن ەكى ەسە كوپ. قىلمىستاردىڭ كوپ بولىگى جەزوكشەلىكپەن اينالىسۋعا جانە جەڭگەتايلىققا ارنالعان پريتوندار ۇيىمداستىرۋعا نەمەسە ۇستاۋعا قاتىستى بولادى: 35 جاعداي، بىردەن 75 پايىزعا كوپ.
تاعى سەگىز جاعداي كامەلەتكە تولماعانداردى ساتۋمەن بايلانىستى، جەتى ءىس كامەلەتكە تولماعانداردى جەزوكشەلىككە تارتۋعا بايلانىستى، التى ءىس ادام ساتۋ جانە جەزوكشەلىككە تارتۋعا قاتىستى، ال ءبىر جاعداي پايدالانۋ ماقساتىندا زاڭسىز باس بوستاندىعىنان ايىرۋ جاعدايىنا كەلەدى.
جالپى 2020 جىلعى قاڭتار-جەلتوقسادا ادام ساۋداسىنا بايلانىستى 120 قۇقىق بۇزۋشىلىق تىركەلگەن. بۇل ءبىر جىل بۇرىنعىعا قاراعاندا 34,1 پايىزعا از.
بيىلعى بەس ايدا كامەلەتكە تولماعانداردى ساتقانى ءۇشىن 25 ادام، جەزوكشەلىكپەن اينالىسۋعا ارنالعان پريتوندار ۇيىمداستىرعانى نەمەسە ۇستاعانى جانە جەڭگەتايلىق ءۇشىن - التى ادام، ادام ساۋداسى ءۇشىن - ءتورت ادام قىلمىستىق جاۋاپكەرشىلىككە تارتىلعان.
كوپشىلىگى قازاقستان ازاماتتارى، سونداي-اق "كامەلەتكە تولماعاندار ساۋداسى" بابى بويىنشا تمد ەلدەرىنىڭ ەكى ازاماتى قىلمىستىق جاۋاپكەرشىلىككە تارتىلدى. ادام ساۋداسىنا بايلانىستى قىلمىستارعا كىنالىلەردىڭ بارلىعى دەرلىك ورتا نەمەسە ورتا ارناۋلى ءبىلىمى بار جۇمىسسىزدار. جىل باسىنان بەرى مۇنداي قۇقىق بۇزۋشىلىقتاردان 25 ادام، ونىڭ ىشىندە 23 ايەل، توعىز كامەلەتكە تولماعان ادام زارداپ شەككەن.
"پايدالانۋ ماقساتىندا باس بوستاندىعىنان زاڭسىز ايىرۋ" بابىن ەسەپتەمەگەندە (قك-نىڭ 126-بابى 3-بولىگى 2-تارماعى).
بۇۇ-نىڭ ەسىرتكى جانە قىلمىس جونىندەگى باسقارماسىنىڭ دەرەكتەرى بويىنشا، ورتالىق ازيا مەن شىعىس ەۋروپا ەلدەرىندە ادام ساۋداسى قۇرباندارىنىڭ باسىم بولىگى ءماجبۇرلى ەڭبەك (66 پايىز) جانە سەكسۋالدىق نيەتتە (23 پايىز) پايدالانۋ ءۇشىن باس بوستاندىعىنان ايىرۋ نەگىزىندە جۇرەدى.
ورتالىق ازيا ەلدەرىندەگى قۇربانداردىڭ كوپشىلىگى - ەرەسەك ايەلدەر (55 پايىز). الايدا ەر ادامدار - 32 پايىز، ونىڭ ىشىندە ۇلدار - سەگىز، قىزدار - بەس پايىزدى قۇرايدى.
قازاقستان ادام ساۋداسى تۋرالى جاھاندىق باياندامادا "باقىلاۋ تىزىمىنەن" ەلدەردىڭ ەكىنشى ساناتىنا (Tier 2) ءوتتى. بۇل ادام قۇقىقتارىن قامتاماسىز ەتۋدىڭ وسى سالاسىنداعى جاعدايدىڭ جاقسارعانىن كورسەتەدى، دەپ حابارلادى ءسىم.
