«قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ 113-3-بابىنا سايكەس 2021 جىلعى 25 شىلدە دە اۋىلدىق وكرۋگتەر اكىمدەرىن سايلاۋى وتەدى. زاڭداعى جاڭا باسىمدىلىق اياسىندا اۋىل اكىمىن بۇقارانىڭ تاڭداۋى الماتى وبلىسىنىڭ 71 وكرۋگىندە وتكىزىلەدى.
بارلىعى سايلاۋدا 17 اۋماقتىق جانە 198 ۋچاسكەلىك سايلاۋ كوميسسيالارى، 1451 سايلاۋ كوميسسيالارىنىڭ مۇشەلەرى جۇمىس ىستەيدى. سايلاۋشىلار سانى 221672 ادامدى قۇرايدى.
279 تۇلعا ۇسىنىمدارىن جىبەرىپ ۇلگەرگەن. ونىڭ ىشىندە 93-ءى ساياسي پارتيانىڭ وكىلدەرى بولسا، 186 ازامات اۋىلدىق وكرۋگتى باسقارۋعا قاۋقارلىمىن دەپ، ءوزىن-ءوزى ۇسىنعان. ايتا كەتۋ كەرەك، اقسۋ، الاكول، كەگەن، كەربۇلاق، پانفيلوۆ اۋداندارىنا قاراستى اۋىلدىق وكرۋگتەرىنە اكىم بولىپ سايلانامىن دەۋشىلەر ءوزىن-ءوزى ۇسىنعان.
كانديداتتار اراسىنان 243-ءى تالاپقا ساي كەلسە، 16 تۇلعا ساياسي باسەكەدەن شەت قالدى.
«154 ۇمىتكەر جۇمىس ىستەپ جۇرگەن مەملەكەتتىك قىزمەتشىلەر بولىپ تابىلادى. ونىڭ ىشىندە 35 ۇمىتكەر قايتا سايلانۋ ارقىلى داۋىسقا سالىنادى. ورتاشا باسەكەلەستىك – 3,9 ادام. بارلىق وكرۋگتەردە ۇمىتكەرلەردىڭ سانى 3-تەن كوپ. ەڭ كوپ ۇمىتكەر تىركەلگەن ايماق، ىلە اۋدانى چاپاەۆ اۋىلدىق وكرۋگى. مۇنداعى كانديداتتاردىڭ سانى 9-ى قۇراپ وتىر»،-دەيدى الماتى وبلىستىق سايلاۋ كوميسسياسىنىڭ مۇشەسى قاھارمان جاقسىلىق.
رەسپۋبليكالىق بيۋدجەتتەن ءاربىر كانديداتقا ۇگىت-ناسيحات جۇمىستارىن جۇرگىزۋگە 220 مىڭ تەڭگە قارجى بولىنەدى. كورسەتىلگەن سوما باق-تا جاريالاۋ، ۇگىت ماتەريالدارىن شىعارۋ، كولىك شىعىندارىن وتەۋگە جۇمسالاتىن بولادى.
سايلاۋعا ءتۇسۋشى تۇلعالاردان ۇسىنىم قابىلداۋ 9 شىلدە كۇنى مارەسىنە جەتەدى. 14 -24 شىلدە ارالىعىندا ۇگىت جۇمىستارى جۇرگىزىلەدى. ال، 25 شىلدە دە سايلاۋ وتەتىن بولادى. وسىلايشا 71 وكرۋگتە سۋ جاڭا اكىم مەملەكەتتىك قىزمەتتىڭ تىزىگىنىن قولىنا الادى.
ايتا كەتەيىك، رايىمبەك اۋدانى مەن تالدىقورعان جانە قاپشاعاي قالالارى ماڭىنداعى وكرۋگتەردىڭ باسشىلارىنىڭ قىزمەتتىك مەرزىمى اياقتالماعانىنا بايلانىستى، وسى ايماقتاردا اۋىلدىق وكرۋگتەر اكىمدەرىن سايلاۋى وتكىزىلمەيدى.
