الماتى وبلىسى بويىنشا سىبايلاس جەمقورلىققا قارسى قىزمەت «الماتى وبلىسى ىلە اۋدانىنىڭ ءبىلىم ءبولىمى» مەملەكەتتىك مەكەمەسىنىڭ باسشىسىنا قاتىستى سوتقا دەيىنگى تەرگەۋ امالدارىن جۇرگىزۋدە، دەپ حابارلايدى "ادىرنا" پورتالى.
«كۇدىكتى ىلە اۋدانىنداعى جالپى ءبىلىم بەرەتىن مەكتەپتەردە ءىس جۇزىندە جۇمىس ىستەمەيتىن تۇلعالاردىڭ جالاقىسىن ءوندىرىپ الۋ ماقساتىندا، ءبىر توپ تۇلعالارمەن الدىن الا ءسوز بايلاسۋ ارقىلى 680 ميلليون تەڭگە كولەمىندە بيۋدجەت قاراجاتىن جىمقىردى، سونىمەن قاتار ءوزىنىڭ قىزمەتتىك وكىلەتتىگىن اسىرا پايدالانىپ، بيۋدجەت قاراجاتىن ۇرلادى دەگەن كۇدىككە ءىلىندى. جۇرگىزۋشىسىن جالعان تۇردە مەكتەپ-گيمنازياسىنا كاسىپتىك باعدار بەرۋ جونىندەگى كەڭەسشى قىزمەتىنە ورنالاستىرعان، وعان جالپى سوماسى 4,9 ملن تەڭگە زاڭسىز جالاقى تولەنگەن»، - دەپ حابارلادى انتيكور.
سوتتىڭ سانكتسياسىمەن كۇدىكتى قاماۋعا الىندى. تەرگەۋ جالعاسىپ جاتىر. قىلمىستىق ءىس جۇرگىزۋ كودەكسىنىڭ 201-بابىنا سايكەس، تەرگەۋ مۇددەسىن كوزدەيتىن وزگە مالىمەتتەردى تاراتۋعا بولمايدى.
