تۇركىستان وبلىسىندا ەر ادام ساۋدا ورتالىعىن توناپ، 23 ملن تەڭگەنىڭ زاتىن الىپ كەتكەن دەپ حابارلايدى "ادىرنا" ۇلتتىق پورتالى "Polisia.kz-كە" سىلتەمە جاساپ.
سارىاعاش اپب-نىڭ كەزەكشى بولىمىنە 102 تەلەفونى ارقىلى حابارلاما كەلىپ تۇسكەن. وندا سارىاعاش قالاسىنىڭ كوشەلەرىنىڭ بىرىندەگى ساۋدا ورتالىعىندا توناۋ قىلمىسى ورىن العانى جايلى كورسەتىلگەن. ساۋدا ورتالىعىنا بەلگىسىز ازامات كەلىپ، 93 دانا ۇيالى تەلەفون مەن ەكى دانا نوۋتبۋكتى جىمقىرىپ، جالپى 23 ميلليون تەڭگە شىعىن كەلتىرگەن.
پوليتسيا قىزمەتكەرلەرى اتالعان جايتتى قر قك-ءنىڭ 191-بابى (توناۋ) بويىنشا تىركەپ، قىلمىستى اشۋ ءۇشىن جەدەل-تەرگەۋ توبى قۇرعان. پوليتسەيلەر كۇدىكتىنى ءىزىن سۋىتپاي قۇرىقتاۋ ماقساتىندا قاجەتتى شارالاردى جۇزەگە اسىردى. كۋاگەرلەردەن سۇراستىرىپ، وقيعا بولعان جەردىڭ جان-جاعىن ارالاپ، بەينەباقىلاۋ كامەرالارىن مۇقيات قاراپ شىقتى. ناتيجەسىندە كۇدىكتى ازاماتتىڭ جەكە باسى انىقتالىپ، تۇرعىلىقتى ۇيىنەن قولعا ءتۇستى. قازىرگى تاڭدا كۇدىكتى قاماۋعا الىنىپ، تەرگەۋ امالدارى جالعاسۋدا.
بەلگىلى بولعانداي، كۇدىكتى ازامات تۇنگى ساعات 03:00 شاماسىندا ساۋدا ورتالىعىنا ەسىك ارقىلى كىرىپ، قاراۋىلدى قورقىتىپ، اجەتحاناعا قاماپ قويعان. سودان سوڭ قولىنا ىلىنگەن ۇيالى تەلەفوندار مەن نوۋتبۋكتەردى الىپ، وقيعا ورنىنان بوي تاسالاعان.
ۇرلىق جاساعان ەر ادام قولدى ەتكەن زاتتاردىڭ بارلىعىن ساتىپ، اقشاسىن باس پايداسىنىڭ قاجەتتىلىگىنە جۇمساعان.
"ادىرنا" ۇلتتىق پورتالى.
