«ءتانى ساۋدىڭ جانى ساۋ» دەگەن بابالارىمىزدىڭ وسيەتىن ارداقتاپ، سالاۋاتتى ءومىر سالتىن قالىپتاستىرۋدا دەنى ساۋ جاس ۇرپاقتى تاربيەلەۋ ماقساتىندا ەلىمىزدە كوپتەگەن ىرگەلى ىستەر قولعا الىنىپ، ناقتى جۇمىستار اتقارىلىپ جاتىر.
سپورت، اسىرەسە جەكپە-جەك سپورت تۇرلەرى ەلىمىزەگى سپورت سالاسىندا جەتەكشى سپورت ءتۇرى بولىپ كەلەدى. حالىقارالىق، الەمدىك دەڭگەيدەگى جارىستاردا ەلىمىزدىڭ سپورتشىلارى قاشان دا بيىك بەلەستەردى باعىندىرىپ، قازاق ەلىنىڭ ابىرويىن اسقاقتاتقان ساتتەرى از ەمەس. وجەتتىلىكتى، باتىرلىقتى، اقىل مەن قايراتتى قاتار الىپ جۇرگەندە عانا جەڭىس شىڭىنا جەتە الاسىز. اتا-بابالارىمىزدىڭ وتان قورعاۋداعى قان مايدانداعى ەرلىكتەرى بۇگىنگى بەيبىت زاماندا سپورتتىق جارىستار كەزىندە ۇرپاقتارىنىڭ بويىنان وسىلايشا كورىنىس تاۋىپ وتىر.
جاستاردى تەك قانا سپورتقا باۋلىپ قويماي، ولاردىڭ ءبىلىمدى ءھام رۋحاني قۇندىلىقتارمەن سۋسىنداتۋ وسىنداي الماعايىپ زاماندا ەڭ ءبىر قاجەتتى تاربيە ەمەس پە؟ ولاردىڭ ءارتۇرلى ءدىني اعىمداردىڭ جەتەگىندە كەتپەي، ءوزىمىزدىڭ ءتول مادەنيەتىمىزدى، ءداستۇرىمىزدى ۇستانىپ، ۇلتتىق مۇددە جولىندا قىزمەت جاسايتىن ازاماتتاردى قالىپتاستىرۋ، تاريحىمىزدا وتكەن باتىر دا دانا بابالارىمىزدىڭ ونەگەلى ءومىرىن ۇلگى ەتۋ بۇل ەندى عانا جۇمىسىن باستاپ جاتقان «كوكجەل» ۇلتتىق جەكپە-جەك سپورت تۇرلەرى فەدەراتسياسىنىڭ باستى ماقساتى بولماق.
وسىنداي شارالاردىڭ ءبىرى جاقىندا الماتى وبلىسى، ىلە اۋدانى، بايسەركە اۋىلدىق وكرۋگىنىڭ جاڭا تالاپ اۋىلىندا وتكەن بوكستان جاسوسپىرىمدەر اراسىنداعى حالىقارالىق جارىس. جارىسقا رەسەي، قىرعىزستان، وزبەكستان مەن ەلىمىزدىڭ استانا، تاراز، تالدىقورعان، الماتى، اقتوبە، قوستاناي، قىزىلجار،وسكەمەن، شىمكەنت، اتىراۋ قالالارىنىڭ جانە الماتى وبلىسىنىڭ جاركەنت، ماتاي، قاسكەلەڭ مەن بايسەركە اۋىلدارى وزدەرىنىڭ كوماندالارىنان جاساقتالعان جاس بىلعارى قولعاپ شەبەرلەرى قاتىستى. قازاق كاسىپقوي بوكسىنىڭ العاشقى ارداگەرى، ەلىمىزدىڭ ماقتانىشى، قر ەڭبەك سىڭىرگەن سپورتشەبەرى، ەڭبەك سىڭىرگەن جاتتىقتىرۋشى قانات سيقىمباەۆ وسى جارىستىڭ باس تورەشىسى بولدى. حالىقارالىق دارەجەدەگى تورەشىلەر رەسەي فەدەراتسياسىنان ەسوۆ ا.ف، AIBA دارەجەسىندەگى تورەشى پول مىرزا، سامانبەكوۆ ا.ا، ۇلتتىق كاتەگورياداعى تورەشى نوعاتاەۆ ب.ت. جەكپە-جەكتەرگە قازىلىق جاساپ، سپورتشىلار مەن جانكۇيەرلەردىڭ العىسىنا بولەندى.
جاڭا تالاپ اۋىلىنداعى №25 مەكتەپتىڭ سپورت الاڭىندا وليمپيادالىق رينگ قۇرىلىپ اشىق اسپان استىندا وتكەن تۋرنير ءتورت كۇنگە جالعاستى. وسى ءتورت كۇن اۋىلداعى ۇلكەن مەرەكەگە اينالدى. جارىستىڭ اشىلۋ سالتاناتىندا اۋدان ونەرپازدارىنىڭ قاتىسۋىمەن كونتسەرتتىك شارا وتكىزىلدى. ىلە اۋدانىنىڭ اكىمى مەدەۋوۆا ك. حانىم ءوز سوزىندە وسىنداي اۋىلدىق جەردە ءىرى حالىقارالىق جارىستى ۇيىمداستىرعان جاڭاتالاپ اۋىلى اقساقالدار كەڭەسىنىڭ توراعاسى ساعىنوۆ كەڭەس ءاليۇلىنا، حالىقارالىق دارەجەدەگى تورەشى، كسرو سپورت شەبەرى سامانبەكوۆ اباي اسىلبەكۇلىنا، «كوكجال» فەدەراتسياسىنىڭ وكىلدەرىنە ءوزىنىڭ ۇلكەن العىسىن جەتكىزدى.
جارىستىڭ سوعى كۇنىندە سپورتشىلار مەن جانكۇيەرلەردىڭ، جەر-جەردەن كەلگەن قوناقتاردىڭ قاتىسۋىمەن ىلە اۋدانىنىڭ قۇرمەتتى ازاماتى، وتان سوعىسى جانە ەڭبەك ارداگەرى، جاڭاتالاپ اۋىلىنىڭ توراعاسى بولعان اسانباەۆ ءابدىحاميت اتانىڭ رۋحىنا ارناپ اس بەرىلدى. اس ۇستىندە حالقىمىزدىڭ تاريحىنان كوپتەگەن ونەگەلى اڭگىمەلەر ايتىلىپ، بابالارىمىزدىڭ يگى ىستەرى دارىپتەلدى. كوپتى كورگەن اقساقالدار سپورتشىلارمەن وزدەرىنىڭ ومىرلىك جولىنىڭ تاعىلىمدى ساتتەرىمەن ءبولىسىپ، بارشاسىن شىنايى دوستىققا، ەلىمىزدىڭ ءوسىپ-وركەندەۋى جولىندا ايانباي ەڭبەك ەتەتىن ازاماتتار بولىپ جەتىلۋىنە تىلەكتەرىن ءبىلدىرىپ، باتالارىن بەردى.
2001 جىلدان باستاپ 2008 جىلى تۋعان جاسوسپىرىمدەر اراسىنداعى جارىستا قىرعىز رەسپۋبليكاسىنىڭ كومانداسىن جاتتىقتىراتىن الەم چەمپيونى، ازيا قۇرلىعىنىڭ ەكى مارتە جەڭىمپازى، وليمپيادا ويىندارىنا قاتىسۋشىسى، بىشكەك قالاسىنداعى وليمپيادالىق سپورت رەزەرۆتەرى مەكتەبىنىڭ اعا جاتتىقتىرۋشىسى قىدىراليەۆ تالايبەكتىڭ شاكىرتتەرى 56 كگ جانە +81 كگ سالماق دارەجەلەرىندە التىنان القا تاقتى. رەسەي فەدەراتسياسى مەن وزبەكستان كوماندالارى ءبىر-ءبىر التىن مەدالعا قول جەتكىزدى. ەلىمىزدىڭ قىزىلوردا قالاسىنداعى №13 سپورت مەكتەبىنىڭ بوكسشىلارى 24, 32, 40 كگ سالماق دارەجەلەرىندە جەڭىمپاز اتانىپ، جالپىكوماندالىق ەسەپتە ءبىرىنشى ورىنعا قول جەتكىزدى.
اۋىلدىق جەردە وتكەن حالىقارالىق دەڭگەيدەگى تۋرنير اۋىلداعى تالاي ءجاسوسپىرىمنىڭ ساناسىنا وي سالىپ، جىگەرىن جانىعان شارا بولدى. اۋىل سپورتىن دامىتۋ ەلىمىزدە ءالى دە بولسا قولداۋدى قاجەت ەتەدى. «كوكجال» فەدەراتسياسى اۋىلدىق جەردەگى سپورتتى دامىتۋ باعىتىندا الداعى ۋاقىتتا ناقتى جۇمىستار اتقاراتىن بولادى. الماتى وبلىسى، ىلە اۋدانى، بايسەركە اۋىلدىق وكرۋگىنە قاراستى التى اۋىلدىق ەلدى-مەكەن بار ەكەن. حالقى تىعىز ورنالاسقان وسى ايماقتا سپورت ۇيىرمەلەرى جەتىسپەيدى. وسى وكرۋگتەگى ونعا تارتا مەكتەپتىڭ سپورت زالدارىنان بوكس، كۇرەس جانە ارالاس جەكپە-جەك تۇرلەرىنەن ۇيىرمەلەر اشىپ، كوپبالالى وتباسىلار مەن الەۋمەتتىك جاعدايى تومەن، تولىق ەمەس وتباسىلاردىڭ بالالارىنا جەڭىلدىكتەر مەن تەگىن قاتىسۋعا مۇمكىندىك جاسايدى. بۇل جونىندە جەرگىلىكتى اۋىل اكىمدىكتەرىمەن ارنايى مەماراندۋمعا وتىرىپ، ۇيىمداستىرۋ جۇمىستارى قولعا الىندى. بولاشاقتا وسى يگى ىستەردىڭ جەمىسىن كورەتىن كۇن دە الىس ەمەس.
ارداق بەركىمباي
«كوكجال» سپورت كلۋبى بىرلەستىگىنىڭ
الماتى قالاسى جانە وبلىسى بويىنشا جەتەكشىسى.
