ىندەتكە قارسى ەكپەنى ءار قازاقستاندىقتىڭ قابىلداۋى مىندەتتى. تاڭداۋ قۇقى تەك ءتۇرلى سوزىلمالى اۋرۋلارى مەن مەديتسينالىق قارسى كورسەتىلىمى بار ازاماتتارعا بەرىلەدى. ادىلەت مينيسترلىگىنىڭ مالىمەتىنشە، مىندەتتى ۆاكتسيناتسيا ناۋقانى ويدان شىعارىلعان ءماجبۇرلى شارا ەمەس. بۇل ەلىمىزدىڭ كونستيتۋتسياسىندا جازىلعان نورمالارعا سايكەس ەنگىزىلگەن. ونىڭ ۇستىنە، ينفەكتسيالىق جانە پارازيتتىك اۋرۋلاردىڭ پايدا بولۋى مەن تارالۋىنىڭ الدىن الۋ ءۇشىن دەنساۋلىق تۋرالى كودەكستە دە پروفيلاكتيكالىق ەكپەلەر ەگۋ شاراسى كوزدەلگەن ەكەن. سوندىقتان ەگەر الدەكىمدەر ۆاكتسينا الۋدان باس تارتسا، جۇمىس بەرۋشى ونى ەكى تاڭداۋدىڭ الدىنا قويۋى زاڭدى. ياعني ۆيرۋسقا قارسى ەكپەنى ەگەدى نەمەسە جۇمىستان ۋاقىتشا شەتتەتىلەدى. بۇل تۋرالى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ حابارلايدى.
«ماسەلە، بىلاي عوي. ارينە، ءار ادامنىڭ تاڭداۋ قۇقى بار. ەكپەنى سالام دەسە، سالمايمىن دەسە دە، ەركى وزىندە. الايدا، ۆاكتسينا الماعاندار اينالاداعى ادامدارعا، جاقىندارىنا، ارىپتەستەرىنە قاۋىپ توندىرەتىنى انىق قوي. سول ءۇشىن ەگەر جۇمىس بەرۋشى «ۆاكتسينا الماساڭىز، جۇمىسقا شىعا المايسىز» دەگەن شارت قويسا، ول زاڭعى قايشى ارەكەت بولىپ سانالمايدى»، - دەيدى قر ادىلەت ۆيتسە-ءمينيسترى ناتاليا پان.
"ادىرنا" ۇلتتىق پورتالى
