تۇركىستان وبلىسىنداعى قازىعۇرت اۋدانىنىڭ تۇرعىندارى اۋىزسۋعا زار بولىپ وتىر. تۇرعىندار 10 جىلدان بەرى تىرشىلىك ءنارىن جارىتىپ ىشپەپتى. اسىرەسە، جاز مەزگىلىندە حالىقتىڭ جاعدايى ءتىپتى قيىن دەپ حابارلايدى "ادىرنا" ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ.
جارىتىپ سۋ ىشپەگەن ەڭبەكشى اۋىلىنىڭ بالالارى ويىن دەگەندى مۇلدەم ۇمىتقان. ويتكەنى، تاڭنىڭ اتىسىمەن ەسەگىنە ىدىسىن ارتىپ الىپ، اۋىل ىرگەسىندەگى جالعىز قۇدىقتان تىرشىلىك ءنارىن تاسيدى. تۇسكە دەيىن تاۋسىلىپ قالاتىن سۋ ءۇشىن قۇدىق باسىندا ءبىر-بىرىمەن جاعا جارتىسۋعا دەيىن بارادى.
مىڭ جارىمعا جۋىق تۇرعىنى بار ەلدى مەكەنگە 2010 جىلى ۇڭعىما مەن قۇبىر تارتۋ ءۇشىن وبلىستىق بيۋدجەتتەن 200 ملن تەڭگەگە جۋىق قارجى بولىنگەن. الايدا تازا سۋعا قارىق بولدىق دەپ بورىكتەرىن اسپانعا اتقان تۇرعىنداردىڭ قۋانشى ەكى جىلدان كەيىن سۋ سەپكەندەي باسىلعان. ۇڭعىما اۋىلدى تىرشىلىك نارىمەن قامتامسىز ەتۋگە جاراسىز بولىپ، جىلدار وتە ترۋبالارىنان تەسىكتەر پايدا بولعان. ەندى اپتاپ ىستىقتا حالىق سۋعا جارىماي، زار يلەپ وتىر.
"وسى ۋاقىتقا دەيىن سۋدى مەككەدەن اكەلەتىن ۋاقىت بولدى. حالىقتىڭ وسىنداي جانايقايىن ەستىگەن، حالىق دەگەن جانى اشيتىن ادام بولاتىن بولسا. مەككەدەن بولسىن، قاي جەردەن بولسىن جەتى قات جەردىڭ استىنان بولسا دا قازىپ، وكىمەت دەگەن قارجىنى اياپ جاتقان جوق. تەلەۆيزوردان كۇنىگە ەستىپ جاتىرمىز. پالەن ميلليون سۋعا ءبولىندى، پالەن ميلليون جولعا ءبولىندى دەپ. بىراق، سول ميلليوندار قانە؟ قانە حالىققا جەتىپ جاتقانى؟", — دەيدى اشىنعان اۋىل تۇرعىنى داريعا بالتاەۆا.
جىعىلعانعا جۇدىرىق بولعانداي، اۋىز سۋدىڭ قۇبىرىنان اۋىلعا كىرەبەرىس جەردەگى باي-باعلاندار مەن شەندى-شەكپەندىلەر قورالارىنا سۋ تارتىپ الىپ جاتىر ەكەن. ال ونى تەكسەرىپ جاتقان بىردە-ءبىر شەنەۋنىك جوق دەيدى اشىنعان جۇرت.
"ەڭبەكشى اۋىلىنا تارتىلعان سۋ قۇبىرىنان سۋدى جولدا اكىم، پروكۋرور، باي مىرزالار تارتىپ العان قوراسىنا. قازىرگى تاڭدا، ادام ىشەتىن سۋدى، مال ءىشىپ وتىر", — دەيدى اۋىل تۇرعىنى ەربول وتباەۆ.
ەڭبەكشى اۋىلىندا جەراستى اۋىز سۋ قۇبىرىنىڭ جارىلعانىنا ءبىر ايعا جۋىقتاعان. ونى تۇرعىندار شىرىلداپ ايتقانىمەن، جاۋاپتىلار ەشقانداي شارا قولدانباعان.
اۋدان اكىمىنىڭ ورىنباسارى تايبەك قالىمبەتوۆتىڭ ايتۋىنشا، قازىر اۋىلدا جاعداي قالىپتى. قۇبىرلاردىڭ اقاۋى بار بولعانىمەن، قازىر اۋىزسۋ بەرىلۋدە. جوندەۋ جۇمىستارى ءجۇرىپ جاتىر.
"قازىر ءبىز تولەبي اۋدانىنان ءبىر گەكتار جەردى اۋداندىق جكح ءبولىمىنىڭ اتىنا راسىمدەپ الدىق. اۋداندىق بيۋدجەتتەن جوبالاۋ سمەتالىق قۇجاتتارىن ازىرلەۋگە قارجى ءبولىندى. قازىرگى تاڭدا 1000-2000 كۋبتىق سۋ جيناعىش قويمانىڭ جوبالىق- سمەتالىق قۇجاتتارى ازىرلەنۋدە. قۇرىلىس جۇمىستارى اياقتالعاننان كەيىن سۋ جيناعىش قويما ارقىلى ءبىز اۋىلدى 24 ساعات اۋىزسۋمەن قامتاماسىز ەتەتىن بولامىز. بۇل ماسەلە كەلەسى جىلى 100 پايىز شەشىلەتىن بولادى", — دەيدى ول.
"ادىرنا" ۇلتتىق پورتالى.
