Túrkistan oblysyndaǵy Qazyǵurt aýdanynyń turǵyndary aýyzsýǵa zar bolyp otyr. Turǵyndar 10 jyldan beri tirshilik nárin jarytyp ishpepti. Ásirese, jaz mezgilinde halyqtyń jaǵdaıy tipti qıyn dep habarlaıdy "Adyrna" ulttyq portaly «Eýrazııa» birinshi arnasyna silteme jasap.
Jarytyp sý ishpegen Eńbekshi aýylynyń balalary oıyn degendi múldem umytqan. Óıtkeni, tańnyń atysymen esegine ydysyn artyp alyp, aýyl irgesindegi jalǵyz qudyqtan tirshilik nárin tasıdy. Túske deıin taýsylyp qalatyn sý úshin qudyq basynda bir-birimen jaǵa jartysýǵa deıin barady.
Myń jarymǵa jýyq turǵyny bar eldi mekenge 2010 jyly uńǵyma men qubyr tartý úshin oblystyq bıýdjetten 200 mln teńgege jýyq qarjy bólingen. Alaıda taza sýǵa qaryq boldyq dep bórikterin aspanǵa atqan turǵyndardyń qýanshy eki jyldan keıin sý sepkendeı basylǵan. Uńǵyma aýyldy tirshilik nárimen qamtamsyz etýge jarasyz bolyp, jyldar óte trýbalarynan tesikter paıda bolǵan. Endi aptap ystyqta halyq sýǵa jarymaı, zar ılep otyr.
"Osy ýaqytqa deıin sýdy Mekkeden ákeletin ýaqyt boldy. Halyqtyń osyndaı janaıqaıyn estigen, halyq degen jany ashıtyn adam bolatyn bolsa. Mekkeden bolsyn, qaı jerden bolsyn jeti qat jerdiń astynan bolsa da qazyp, ókimet degen qarjyny aıap jatqan joq. Televızordan kúnige estip jatyrmyz. Pálen mıllıon sýǵa bólindi, pálen mıllıon jolǵa bólindi dep. Biraq, sol mıllıondar qane? Qane halyqqa jetip jatqany?", — deıdi ashynǵan aýyl turǵyny Darıǵa Baltaeva.
Jyǵylǵanǵa judyryq bolǵandaı, aýyz sýdyń qubyrynan aýylǵa kireberis jerdegi baı-baǵlandar men shendi-shekpendiler qoralaryna sý tartyp alyp jatyr eken. Al ony tekserip jatqan birde-bir sheneýnik joq deıdi ashynǵan jurt.
"Eńbekshi aýylyna tartylǵan sý qubyrynan sýdy jolda ákim, prokýror, baı myrzalar tartyp alǵan qorasyna. Qazirgi tańda, adam ishetin sýdy, mal iship otyr", — deıdi aýyl turǵyny Erbol Otbaev.
Eńbekshi aýylynda jerasty aýyz sý qubyrynyń jarylǵanyna bir aıǵa jýyqtaǵan. Ony turǵyndar shyryldap aıtqanymen, jaýaptylar eshqandaı shara qoldanbaǵan.
Aýdan ákiminiń orynbasary Taıbek Qalymbetovtiń aıtýynsha, qazir aýylda jaǵdaı qalypty. Qubyrlardyń aqaýy bar bolǵanymen, qazir aýyzsý berilýde. Jóndeý jumystary júrip jatyr.
"Qazir biz Tólebı aýdanynan bir gektar jerdi aýdandyq JKH bóliminiń atyna rásimdep aldyq. Aýdandyq bıýdjetten jobalaý smetalyq qujattaryn ázirleýge qarjy bólindi. Qazirgi tańda 1000-2000 kýbtyq sý jınaǵysh qoımanyń jobalyq- smetalyq qujattary ázirlenýde. Qurylys jumystary aıaqtalǵannan keıin sý jınaǵysh qoıma arqyly biz aýyldy 24 saǵat aýyzsýmen qamtamasyz etetin bolamyz. Bul másele kelesi jyly 100 paıyz sheshiletin bolady", — deıdi ol.
"Adyrna" ulttyq portaly.
