جامبىل وبلىسىندا اۋىز سۋدىڭ ساپاسىن جاقسارتۋعا بولىنگەن قارجىنى جىمقىرعان شەنەۋنىكتەر سوتتالدى، دەپ حابارلايدى «ادىرنا» ءتىلشىسى.
قورداي اۋدانىنىڭ پروكۋراتۋراسى تۇرعىن ءۇي-كوممۋنالدىق شارۋاشىلىق ءبولىمىنىڭ ەكس-باسشىسىنىڭ 6,5 ميلليون تەڭگە ۇرلاعانىن انىقتادى.
«سارىباستاۋ اۋىلىندا تۇرعىن ءۇي-كوممۋنالدىق شارۋاشىلىق ءبولىمىنىڭ بۇرىنعى باسشىسى «م.»، «قورداي سۋ» مكك ديرەكتورى «ك.» جانە كاسىپكەر «ە.» قۇجات بويىنشا قۇنى 12,3 ميلليون تەڭگەنى قۇرايتىن سۋ مۇناراسىن سالۋى ءتيىس بولعان. الايدا نىساندى ەگجەي-تەگجەيلى تالداۋ جانە ۆيزۋالدى قاراۋ سۋ مۇناراسىنىڭ شىن مانىندە سالىنباعانىن كورسەتتى.
تەرگەۋ بارىسىندا تاراپتار 6,5 ميلليون تەڭگەنى يەمدەنىپ، ءوزارا ءبولىسىپ، اۋىل تۇرعىندارىن وزدىگىنەن اعىپ جاتقان سۋدى پايدالانۋىنا قالدىرعانى بەلگىلى بولدى»،—دەپ ءتۇسىندىردى وبلىستىق پروكۋروراتۋرا.
اتالعان فاكتى بويىنشا اۋدان پروكۋراتۋراسى قىلمىستىق ءىس قوزعادى. قورداي اۋداندىق سوتىنىڭ ۇكىمىمەن باسقارمانىڭ بۇرىنعى باسشىسى كىنالى دەپ تانىلىپ، 8 جىلعا باس بوستاندىعىنان ايىرىلدى. كاسىپكەر 3 جىل 6 ايعا باس بوستاندىعىنان ايىرىلدى.
باسقارما زاڭسىز يگەرىلگەن اقشانىڭ تولىعىمەن مەملەكەتكە قايتارىلعانىن مالىمدەدى. ۇكىم زاڭدى كۇشىنە ەنگەن جوق.
